Minista blong Faenans mo Ekonomik Manejmen i talem se Gavman blong Vanuatu bae i spendem ova long 700 milion Vatu blong adresem situeson blong disasta long aelan blong Ambae.

Gaetan Pikioune i talem se totol figa blong mani ia, hemi blong mas evacuation long las yia 2017, mo bae hemi inkludum ol opereson kost blong steit blong imejensi we i efektiv naoia.

Mr Pikioune, i talem se loa blong mani anda long steit blong imejensi, gavman i save usum pablik mani ia bifo i karem i ko long Palemen blong folem stret fasin blong yusum pablik fand.

Hemi talem se wetem bikfala mani we gavman bae i spendem, hemi impoten blong adresem situeson blong Ambae hemia blong sekurim ol graon beis long loa, blong akomodetem ol famili blong Ambae olsem pemanen hom blong olketa.
Minista Gaetan Pikioune i mekem ol toktok ia long foret blong nakamal blong ol jif blong Sanma provins long Luganville Santo long las wik long taem blong rikonsilieson bitwin ol jif blong Ambae mo blong Sanma provins.