Ofis blong Pablik seves commission i talem se issue blong delay long process blong salary blong olgeta helt wokas long ol hospital araon long Vanuatu hemi problem blong administration long Helt Depatmen.
Jeaman blong PSC, Mr Martin Mahe i mekem toktok ia folem wan question we VBTC nius team i bin askem hem regardem  delay long salary blong ol dokta, nurses long ol hospital.
Hemi kontinu blong talem se administration blong helt depatmen thru long ol Human Resource manager blong olgeta nao i processem ol document blong salary blong olgeta leit mekem se i gat delay everitaem long salary blong ol helt wokas ia.
Mr Mahe i talem se PSC i wait oltaem long ol contract blong ol dokta ia blong kasem PSC blong oli save saenem mo mekem appointment leta blong olgeta.
VBTC nius i andastandem se kasem naoia ol intern dokta mo ol nara helt wokas oli no risivim yet salary blong olgeta sins January yia ia.