Vanuatu Basketball Federation [VBF] i mitim foma NBA basketbol pleia, Andre Moore long Korman Indoor Gymansium long yestede naet.
Pepos blong kam tuketa ia i blong Andre Moore i introdiusem hem long exekutiv blong VBF, ol divelopmen ofisa mo ol basketbol pleia.
Long semtaem hemi tokbaot basketbol laef blong hem sins hemi plei profesonal basketbol blong 5 kantri bifo hemi ritae mo naoia hemi gohed blong ranem Big Feat program blong ol yangfala.
Andre Moore i talem se hemi impress tumas long tenaot blong ol pikinini taem hemi visitim ol skul truaot long wik ia mo hemi promes blong kam bak long manis May yia ia.
Hemi talem se ol Ni-Vanuatu oli gift talented atlet mo i nidim blong i stat plei long eli age mo i mas gat self disiplin mo passion blong plei spot blong yu kam wan top atlet.
Basketbol legend ia i talem laswan se blong plei basketbol i no nidim tall man olsem hem, haet blong ol man Vanuatu i oraet be oli mas bildimap intres blong plei mo kam wan person we long fiuja bae pipol i lukap long hem.
Long tede mo Fraede bambae skul visit blong basketbol icon ia bae i gohed bifo hemi go bak long Australia.