Maneja blong Vanuatu Football, Paul Munster i redi blong tekemap jalenj taem hemi stap komandem preparesen blong difren nasonal soka tim from fiuja kompetisen.

Paul Munster i talem toktok ia long Sky Sports afta we hemi winim post blong hed koj blong Vanuatu Football.

Hemi talem se hemi stap wok long India mo taem hemi luk vacant post we VFF i putumaot, hemi sua se bae i tekemap wok ia i mekem se hemi aplae.

Hemi se i gat bigfala wok blong priperem sinia tim blong go long Samoa Pacific Games, U-23 mo U-20 tim from 2020 Olympic kwalifaea.

Hemi gat strong biliv blong save winim ol bigfala futbol faenol taem hemi karem konfidens long tim.

Munster i just finisim profesonal futbol laesens long saed blong koj wetem Harry Kewell mo Benni McCarthy.