Praem Minista, Charlot Salwai Tabimasmas i talem se hemi wandem luk project blong faktri blong fish long Vanuatu, we hemi wan longtaem project hemi mas kam into rialiti.

Hemi talem se gavman blong Vanuatu, hemi ple part blong hem blong autem fisheries long Paray Bay, be kampani blong China hemi fail blong mekem part blong hem.

Praem Minista Salwai i mekem toktok ia taem we hemi mitim Minista blong Agriculture blong China, Han Changfu long yesterdei (Tue) long Port Vila.

Hemi talem se pipol blong Vanuatu i wandem luk ol fish blong solwota blong Vanuatu oli offlodem mo prosesem long Vanuatu nomo.

Praem Minista i talem se wok blong offlodem ol fish blong Vanuatu long difren kantri hemi mekem tu se vanuatu i save go long black list from we vanuatu ino rikodem hamas kilo o ton fish we ol fishing bot i stap kasem long solwota blong hem.

Hemi talem se fish processing faktri ia hemi shut givim wok tu long ol man ples.

Long respond, Minista blong agrikaltsa blong China mo delegesen blong hem i asurem Praem Minista Salwai se project blong Paray Bay bae hemi finis bifo yia ia hemi finis.

Long nara development Hed blong gavman, Charlot Salwai Tabimasmas, i welkamem wan MOU we minista blong agrikalja blong Vanuatu, Hosea Nevu, mo minista blong agrikalja blong China, Han Changfu, i bin saenem long yestedei.

MOU ia, hemi blong woking kopereson bitwin tufala kantri long benefit blong tuketa kantri, mo i kavremap tu fisheries.

Pablik rileson ofisa blong Gavman, Hiliare Bule, i talem se praem minista, Charlot Salwai Tabimasmas, i glad long MOU ia, mo hemi talem tankyu long gavman blong China long ol asistens blong hem i kam long Vanuatu, semak olsem ol nara kantri long fom blong grant o on.