Vaum Presbyterian Junia sekondri skul long aelan blong Paama, i lukim african snel olsem wan tret long ol agrikaljarol prodakt long aelan ia.
Peter Tarileo, agrikalja tija blong skul ia, i ripotem long VBTC nius se skul i bin kolektem 180 kilogram blong african snel ia long las wik, mo oli ko sakem long solwota.
Kolekson blong ol african snel ia, i hapen tru long wan kompetison, mo skul i awodem fes praes mani long grup we i kolektem haes kilogram blong ol snel ia mo ol nara grup blong ol studen oli karem praes mani tu.
Mr Tarileo, i talem se ol snel ia oli kam wan tret long ol aelan kabij wetem ol nara krop, i mekem se skul i disaed blong tekem lid blong daonem namba blong ol snel ia.
Hemi talem se ol memba blong komuniti oli kat tinktink tu blong kolektem ol snel ia long ol dei we i kam, mo distroem. Oli talem se oli lukim presens blong ol snel ia long aelan blong Paama sins las yia.