Sivil Avieson Otoriti i inspektem finis Longana eapot long east Ambae long Wednesdei wik ia.

Ash-fol aktiviti blong Manaro volkenu i mekem se ol plen i no sevisem eapot ia bakegen.

Faending blong Sivil Avieson Otoriti se Longana eapot i no mitim tumas ol rul blong Sivil Avieson.

Wan long ol eria we i no mitim ol rul blong Sivil Avieson Otoriti, hemi from i nokat wan gudfala sekuriti fens blong protektem ol animol i ko insaed long eapot ia.

 

Nara samting hemi from ol kokonat tri mo ol nara tri kolosap long eapot oli hai tumas, mo i afektem ea-flo, we hemi impoten long paelot, blong ridim bifo i land or tekoff long Longana eapot.

 

Sivil Avieson Otoriti i talem se ranwei sevis, haet blong gras, mo drenej sistem blong eapot ia i no mitim tumas pefomens standad.

 

Wetem ol kondison ia, Sivil Avieson Otoriti, i advaesem evri avieta we oli wandem operet i ko long Longana eapot, se oli nid blong keaful, blong mekem sua se eapot i klia gud bifo oli land or tekoff.

 

Otoriti ia i advaesem evri paelot blong tekem gud lukluk blong faenem darekson blong win mo spid blong landing or tekoff. Ol hae tri we oli stanap klosap long eapot oli save afektem flou blong win.

 

Sivil Avieson Otoriti i nidim kopereson blong evri stekholda wetem asistens blong monitarem mo ripotem eni samting we i save afektem ol sef opereson i ko long Longana eapot.