Ol indipenden kandidet blong 2020 Jenerol Elekson, oli expektem blong pem wan fi blong 300-taosen Vatu.

Ol kandidet we oli memba blong wan politikol pati bae oli stil pem 100-taosen fi olsem long ol pas elekson long nekis yia.

 

Olsem pat blong politikol rifom blong Vanuatu, jeaman blong politikol rifom taskfos komiti, Ralph Regenvanu, i konfemem long VBTC nius se ol indipenden kandidet oli expektem inkris blong kontes fi.

 

Long narasaed, VBTC nius i andastandem se elektrol Ofis i no kasem yet eni infomeson abaot inkris blong ol kandidet fi we oli wandem kontestem jenerol elekson long nekis yia from hemi still wan proposol blong taskfos komiti blong politikol rifom.

 

Folem nius ia, wan lokol we oli stap wok blong putum wan independent kandideit, Ronald Joseph i talem se nius ia hemi daunem rights blong ol Ni-Vanuatu blong stanap long wan eleksen.

 

Mo hemi adem se Constitution i kivim rait blong ol man ples blong save stanap long eleksen.

 

Hemi talem se disisen ia hemi no fair, mo bae i mekem se sam pipol nomo we oli save afford, bae oli save pem fee blong kontest.

 

Mr Joseph i mekem save tu se hemia bae i fulfilim ol toktok se olketa we oli rich bae oli kontinue blong rich, mo olketa we oli pua bae oli ko hed blong stap pua.

 

Hemi talem tu se olketa i pripea blong chalenjem disisen ia long kot.