Suprim Kot blong Vanuatu i sidaon long yestedei safa, mo disison blong hem bae i kam aot long namba 27 May 2019 long 2 oklok long aftenun.
Suprim kot i bin sidaon long period blong 3 haoa 30 minit blong harem Constitutional aplikeson mo ol respon blong ol pati konsen.
Konstitutional kes namba 2,481 blong 2018 i stap bitwin Ishmael Kalsakau & Others, mo Fes, sekon mo third respondent we hemi Praem Minista mo ol Palementri sekreteri.
Loya Robin Kapapa i ripresentem Ishmael Kalsakau long Suprim Kot, Steit Loa i ripresentem Praem Minista mo loya Less Napuat i ripresentem sam Palementri Sekreteri.
Robin Kapapa i talem bifo long Jaj blong Suprim Kot, Dudley Aru, se klaeant blong hem olsem wan elekted Lida mo wan memba blong Palemen, hemi kat diuti ia blong protektem konstituson mo loa blong Vanuatu.
Mr Kapapa i talem se apoenmen blong ol Palementri sekreteri i no folem Mama Loa blong Vanuatu mo i nokat wan loa we i givim raet long Praem Minista blong i mekem ol apoenmen ia.
Hemi akiu bifo long kot beis long Atikol 39, 40, 42, mo 43 blong Nasenal Konstituson blong Vanuatu.
Hemi talem se ol swon stetmen we ol klaeant blong hem i faelem i soem ol efidens se ol apoenmen blong ol Palementri Sekreteri i no folem Nasenal Konstituson blong Vanuatu.
Ol aplikants i kat 5 poens evriwan we akiumen blong olketa i beis long hem mo oli riferem kot long semak kes long India mo Niue we i lukim ol kot blong kantri ia oli rul se apoenmen blong ol asisten minista hemi no folem konstituson.
I kat plande akiumen we ol Aplikant i stetem bifo long Suprim Kot mo oli askem kot sapos i faenem feva blong olketa, ol Palementri sekreteri we oli stap tedei oli mas rifandem bak evri mani we oli pem olketa long hem.
Long narasaed, Steit Loa we i ripresentem Praem Minista, i stetem se Apoenmen blong ol Palementri Sekreteri i beis long loa we hemi Ofisol Salarys Act mo exasaes blong ol apaoenmen ia i hapen insaed long exekutiv arm blong Gavman.
Steit Loa i talem se olketa i rilae bikwan long ol sabmison we oli bin faelem i ko long Kot.
Long saed blong Loya we i ripresentem Palementri Sekreteri we ol namba 3 responden, Less Napuat, i talem bifo long kot se kot i sud straekem aot kes fromn apoenmen blong ol Palementri sekreteri i hapen folem Ofisol Salaris Akt.
Be long respon blong aplikants ova long respons blong ol respondent, i talem se Salaris Akt hemi blong ol ofisa we oli wok long ofis mo loa ia i gavenem olketa be i no givim ligol paowa long Praem Minista blong mekem apoenmen anda long loa ia.
Afta long plande toktok insaed long kot, Suprim Kot blong Vanuatu i talem se bae i handem daon disison blong hem long namba 27 May long 2 oklok long aftenun.