Pri skwad blong bij soka tim blong Vanuatu i stap go tru long intensive trening naoia from Oceania Beach Soccer Championship we bambae i tekples long Tahiti long end blong next manis.

Bij soka divelopmen koj, Joel Rarua i ripotem se bambae oli finalisem tim long end blong wik ia mo oli gat nara 3 moa wiks blong pripea gud from tunamen.

Joel Rarua i explenem se Vanuatu Football i disaed blong sendem wan niu tim i go long Franis Polynesia afta we Vanuatu i bin aot long tunamen ia blong samfala yia nao.

Vanuatu Football Federation i se hemi stat blong rivaevol blong bij soka long kantri from afta long OFC Championships long Tahiti bae i gat lonj blong bij soka jampionsip mo divelopmen prokram blong hem i tekples long kapitel.