Pipol blong aelan blong NGUNA i hapi bigwan we Minista blong Health, Honorobol Norris Jack KALMET i save spendem Labour day we hemi Pablik Holidei, long yesterdei, wetem olgeta.

Minista KALMET we hemi semtaem MP blong EFATE Rural, i handem-ova 1-hundred tausen vatu i ko long ELAUFARAU komuniti.

Long nara vilaj antap long hil, l we oli save long hem olsem EUTA-FARAU Minista Kalmet, hemi givim 2 hundred tausen vatu long olgeta.

Ol donation ia hemi olsem part blong allocation blong Minista Norris Kalmet i ko long evri vota blong hem.

Minista Norris Jack KALMET i talem thankiu long sapot blong Pipol blong Nguna aelan, mo semtaem hemi enkarejem olgeta blong ko hed blong wok tuketa wetem hem blong oli save developem gud aelan blong Nguna.

Minista blong Helt i mekem official visit ia wetem First Politikel advisa blong hem, Luna TASSO, Private advaesa Willy POSEN, mo tu sam nara politikel advisa.