Kava emi wan komoditi we i gat bigfala potensel tumas blong helpem man Vanuatu i kasem mane blong helpem famli mo helpem kaontri i kasem moa self-rilaians.

Douglas Simkins we emi wan fren blong Vanuatu mo semtaem wan bisnisman we emi intres long Agrikalja sekta mo Kava indastri blong Vanutu i talemaot toktok ia long VBTC News yestedei.

Mr Simkins i bin stap long tokbak segment blong VBTC News yestedei mo emi talemaot se long home state blong hem long Utah, westen USA i gat fulap ol nakamal i stap open.

Hem i bin talem se ol nakamal i open finis long Florida, California mo ol narafala bigfala state.

Akoding long Mr Simkins i gat bigfala intres long saed blong ol benefit we kava i stap givim long ol man we oli gat ol difren kaen medikol isiu olsem problem blong slip, mo Anxiety or wariness.

Hemi talem tuu se from growth long kava industri long USA, i gat fulap ol teknology we oli developem we bambae i usful tumas long ol fama mo expota long Vanuatu, blong save talem wanem kaen kava fama i gat, eitha emi Nobol Kava o Narafala kaen Kava, hamas gudfala kemikol nao i stap insaed long ol kava ia.

Douglas Simkins emi stap enkarejem ol man Vanuatu se spos yu gat wan drim o wan tingting blong mekem wan bisnis, yu mas go hed wetem karej blong mekem drim blong yu i kam rialiti, mo wok long Agrikalja, we emi wan gudfala wei blong mekem mane mo tuu ol prodak blong yu bambae i helpem yu mo plante narafala man.

Mr Simkins i stap visit long Vanuatu wetem wife blong hem we emi yangfala Rosita blong Vanuatu.