Kavman blong Franis i helpem ol pipol blong Ambae, mo hemi kivim 3 tan blong ol samting blong usum, olsem samting blong kitchen, ol shelta, ol mat, mo ol tapolen.

Help ia hemi kam long Vanuatu Red Cross Society, tru long French Red Cross we i stap operate long Vanuatu, mo Army blong Franis we i beis long New Caledonia.

Vanuatu Red Cross Society i ripotem se kontribusen ia hemi folem framework agrimen blong FRANZ, we hemi Franis, Australia mo New Zealand, we hemi aim blong sapotem kavman blong Vanuatu blong helpem ol pipol we oli fesem ol natural disasta.

Long las Satedei, 12 May, wan armi plen blong Franis i kasem Bauerfield International airport wetem ol saplai we i kam long French Red Cross long New Caledonia, blong helpem ol pipol blolng Ambae.

Mane blong ol help ia i kasem 10 million vatu mo hemi kam long kavman blong Franis.

Saplai we i kam long kavman blong Franis, ibin pas tru long French Red Cross Delegation long Port Vila, we David Boisson i lidim olsem kantri direkta, mo hemi wok tuketa wetem Vanuatu Red Cross Society mo Franis Embasi long Vanuatu.

Long las manis, kavman blong Vanuatu tru long Nasonal Disasta Management Ofis, NDMO, ibin sendem wan request blong help iko long FRANZ grup, we hemi Franis, Australia mo New Zealand, mo Vanuatu Red Cross Society olsem wan long ol mein humanitarian akta long Vanuatu, mo hemi wok kolosap wetem ol partna blong hem, olsem French Red Cross.