Namba 15 Nasonal Confrens blong ol woman we i go hed long Mele vilij, long Efate emi fes wan we i save karem 84 Provinsol Area representativ blong ol woman raon long Vanuatu i kam tugeta.

Eksekutif Daerekta blong Vanuatu Nasonal Kaonsel blong ol woman VNCW, Leiasmanu Cullwick, i talemaot se fastaem i gat fulap ol smolsmol vois we i stap kamaot long Port Vila be long konfrens ia VNCW i gatarem ol woman lida blong ol area farawei long taon olsem Big Bay, Tores mo Bankis kasem ol saoten aelan blong Vanuatu.

Bigfala tingting blong konfrens emi 'Patisipesen blong ol woman long Disisen- making mo Lidasip.

Mo blong ol woman ia oli kam tugeta blong tokbaot ol difikelti o jalenj we oli stap fesem we i nid blong adresem tugeta.

Mrs Cullwick i talem se ol woman bambae i produsim wan Outkam Stetmen blong help Mapem wan wei fowod blong kaontri i wok long hem.

Hem i talem se VNCW i fesem plante jalenj long ol yia we i pas, be olsem mama oganaesen blong ol woman we i stap karem vois blong evri woman Vanuatu, kaonsel ia emi bin instramental long establismen blong mein makethaos long Vila, VanWod mo tuu blong helpem ol past lida long ratifikesen blong Unaeted Nesen konvensen blong Stopem evri kaen diskriminesen agensem ol woman mo ol gel, or CEDAW.

Hemi talem tuu se long saed blong politik ol woman i fesem jalenj long Unity, blong helpem ol woman i muv fowod.

Mrs Culwick i kontiniu blong talem se wan bigfala prioriti blong VNCW, emi blong wok from namba 1 Sustainable Developmen Goal blong UN we emi blong wok agensem Poveti.

Bigfala konfrens ia emi hapen nomo tru long sapot blong Oxfam mo gavman blong Australia tru long ofis blong Ausaid.

VNCW i petisenem gavman blong givim wan grant blong save oganaesem ol konfrens olsem long fiutja.

Konfrens bambae i finis long Fridei wik ia, namba 18 May.