Spika blong Palemen i talem se hemi nokat pawa blong vaketem sit blong wan memba blong Palemen taem kot i faenem hem i konvikted ova long wan kes, from loa i no alaoem hem blong mekem.

Esmon Simon, i talem long VBTC nius se rol blong hem, hemi blong infomem eni MP sapos i kat konvikted sentens long kot.

Mr Simon, i kliarem ol toktok ia, folem ol toktok we i stap ko raon long pablik mo sosol media se bae i kat wan notis i ko long ,Mr Joe Natuman, blong vaketem sit blong hem afta long konvikson blong kot mo sasbended sentens blong Mr Natuman.

Hemi talem se beis long advaes we hemi risivim long Steit Loa Ofis, hemi veboli infomem, Joe Natuman, wanem standing oda blong Palemen i stetem.

Spika Esmon Simon, i talem se long tiusde nekis wik bifo fes extra odineri seson blong palemen i sidaon, bambae ofis blong hem i kam aot klia weta or nokat, Joe Natuman, i save entarem Palemen jemba.