Pipol blong noten part blong Vanuatu i gohed blong enjoim hae level futbol kompetisen afta long NSL faenol las wiken.

Noten rijen Champions League i kikof long Luganville Soccer City Stadium long yestede aftanun.

Hemi niufala Champions League we ol futbol asosiesen long not i kam antap wetem long yia ia mo pepos blong hem i blong wanwan jampion blong olketa i kam wanples mo kompit blong faenem ovarol jampion.

Dei wan blong Champions League we hemi long yestede i lukim Malampa Revivors blong Luganville Football i bitim Police FC blong Malampa Football Association long 2-1.

Las kem blong dei, Vanmolmol FC blong Sanma i winim AS Concorde blong Penama Football long 3-1.

Tumoro i gat wan kem long 3 oklok aftanun bitwin AS Condorde mo Police FC mo long Satede tufala tim i plei bageken.

Long mande next wik, Malde FC long Torba Football i plei AS Concorde FC long 12pm mo long 3pm Malampa Revivors vs Vanmolmol FC.

Champions League ia bambae i gohed kasem 30 Julae we hemi Indipendens Dei mo LCM mo Santo Hardware i faenanseli sapotem.