Bigfala divelopmen long proteksen blong ol musik

Ol lokol musician i expek blong winim moa mane wetem niu copyright society ofis.

Afta plante yia we ol musician oli voisem konsen blong olgeta from we oli no save mekem gud mani aot long ol musik we oli mekem mbe long wiken ia oli klad long anaonsmen blong niufala ofis we bae i helpem olgeta.

Registrar blong Vanuatu Intellectual Property Ofis, Britten Yosef, i talem se Kavman hemi givim long yia ia VT 6million blong setem ap ofis blong Vauatu Copyrights Management Society.

Hemi talem se wok bae i stat long October yia ia.

“Principle wok blong societi hemi blong ol musician oli asignem economic raet blong ol copyright wok blong olgeta i ko long Society. Wok blong societI hemi blong negotiatem kontract wetem ol broadcasting organisation o eni organisation we hemi stap yusum ol music or creativ wok blong ol artist blong yumi,” Mr Yosef i talem.

“Bambae society hemi kolektem ol royalti mo distributum i ko bak long ol musician blong yumi. Bambae i kat smol percentej blong ol mane i ko long societi blong supotem administrativ kost.”

Hemi anaonsem set ap blong ofis ia afta long wan march long Port Vila we ol musician blong Nabanga Group oli organisem blong tokbaut proteksen blong lokol musik.

Society ia bae hem establish olsem wan statutory bodi we ol memba blong hem, hemi ol musicians mo olgeta we oli involv long creativ industri.

Long march ia ol musician oli bin sharem se plante time oli fesem had taem blong mekem vatu from we plante oli no stap ting nating long wok blong olgeta, olsem fasen blong mekem copi, mekem rimix, mo ol broadcasta oli yusum mbe i nokat eni paymen i ko long olgeta.

Wan long taem key playa behaed long divelopmen blong music industry hemi Lida blong Opposition, Honoroble Ralph Regenvanu. Mr Regenvanu i talem se eim hemi blong vatu i ko bak long ol musician o artist.

“Spos wan artist i rilisim wan song, i pefomem o taem yu playem wan song long radio i mas kat wan smol mane olsem riwod i ko bak long artist ia from creativiti mo wok blong hem,” Mr Ralph i talem.

Hemi talem se wokbout ia hemi bin wan longfala wokbaot mo hemi bin stat taem fes loa blong Copyright i pas long 2000. Mbe blong ol loa ia i wok blong mitim wanem we ol musician oli wantem i nid blong kat wan nara bodi blong manejem.Hemi tekem kasem 2017 blong kavman hemi jes pasem loa blong Copyrights Management Society.

“Olsem Minister blong foreign Affairs long 2019,  mi bin tablem ratifications blong evri world intellectual property organization agreements we Vanuatu hemi saen ap long hem,”Mr Regenvanu i talem.

“Hemia i mekem se semak loa we i protektem ol artist long kaontri hemi protektem hem long nara kaontri, wan man ovasi hemi mas pem artist bifo i yusum musik blong hem.”

“Yumi glad tumas blong harem se kavman i givim mane blong establishim ofis we bae i manejem hem ia, mo i no long taem bae yumi lukim se goal we yumi stap ko from yumi achievim.”

Office blong Intellectual Property rights i stap advertisem naoia posisen blong Copyright Management Office, mo hem nao bae hemi setem ap ol system in ples blong stat manejem ol musik mo creativ industri.

Artist Ben Ziro mo Gerro Goerge i talem bigfala tankiu long kavman.

Yang musik artist Falgon i talem se Copyright society bae hemi benefitim hem bigwan.

 

 

 

 

 

 

 

(Visited 134 times, 1 visits today)

About The Author

You might be interested in