Bigfala renfol -Saeklon Gina

Weta Ofis i rikodem 165.8 milimita blong renfol we i kosem bigfala flood long ol eria long Efate.

Rikod ia hemi blong Thursday 8am kasem tete Friday 8am folem Category 1 Saeklon Gina.

Long tete moning, social media i fulap long ol foto blong flood long ol eria long Port Vila.

I kat ripot se sam pipol i mas muv aot long ol haos blong olgeta.

Air Vanuatu i putum aot notis blong talem se hemi saspendem ol domestik mo international blong tete from flood i fulap long Bauerfield airport.

Wota i fulum ap ofis blong Air Vanuatu mo VBTC Nius i kasem infomesen se sam domestik parcel i wet wet.

Douglas Tamara, longtaem residen we i liv long Switi i talem se ol otoriti i mas klinim ol drainage evri taem.

Hemi talem se bigfala ren ia, fulap haos wota i ko insaed.

Mr Tamara i talem se ol otoriti i mas akt risponsibol from en blong dei ol pipol long komuniti i kam viktim blong hem.

Wan relaible sos i rispon blong talem se hemi no problem blong drainage be from i nogat gudfala planning system long town.

Saeklon Gina hemi wan smol hariken wetem wind pawa we i forecast long senta. Taem saeklon i mekem wan landfall long Epi, i katem daon spid blong win tu long Efate. Mo plante klaod i afektem ol komuniti long Epi mo Efate we i mekem bigfala flood.

 

 

 

(Visited 295 times, 1 visits today)

About The Author

You might be interested in