Bisnis establishment census -Statistics

Vanuatu National Statistics Office i stap askem ol bisnis raon long Vanuatu blong mas tekpat long Business Establishment Census we oli stap karemaot naoia.

Statistics Ofis i stap karemaot census ia blong save moa abaot ol difren bisnis long formal mo informal sector mo apdeitem wan klia rigistration blong olgeta.

Ol infomesen we census ia i stap askem, hemi abaot ol expenses blong bisnis, mani we business i mekem, hamas wokman blong bisnis mo salari blong ol wokman.

Long wan toktok wetem VBTC, Jeaman blong Business Establishment Census Steering Committee, Raymond Vuti i talem se hemi impoten tumas blong ol business owna oli tekpat long census ia.

“Sipos yu risivim ol enumerator blong census taem oli kam araon, plis yu tekem taem mo spendem taem wetem olgeta blong ansarem ol kwesten from ol responses blong yu oli very impoten,” Vuti I talem.

“Hemi impoten blong yu provaedem ol infomesen ya blong kavman i save situation blong yu, then any request we yu askem, mbai kavman isave rispon long wei we yu wantem.”

James Temakon we hemi coordinator blong Business Establishment Census Steering Committee i talem se ol infomesen we oli kolektem mbai oli presentem i ko long ol plana blong oli save kriatem ol polisis o impruvum ol polisis blong ol business.

Diputi Jeaman blong Business Establishment Census Steering Committee Ben Tokal, i talem se census ia mbai i helpem statistic blong gat wan centralize registry.

“Disasta hemi save strikem yumi anytime so wanem we yumi stap mekem naoia hemi yumi wantem kriatem wan centralize registry,” Tokal i talem.

“Taem yumi gat wan centralize registry, mbai yumi keepim everi infomesen long wan centralize space, mo taem wan disasta hemi strike, mbai i no tekem long taem blong kavman isave rispon.”

Statistics Ofis i askem ol bisnis long Vanuatu blong tingting strong blong tekem pat long census ia from mbai hemi helpem kavman blong i save sapotem gud ol Ni-Vanuatu bisnis owna long fiuja.

By Agnes Herbert.

 

 

(Visited 16 times, 1 visits today)

About The Author

You might be interested in