Bless to be Blessed scheme blong stop

Bless to be Blessed mani scheme i kat 7 dei nomo blong klosem ol operation blong hem long Port Vila.

Reserve Bank blong Vanuatu i kivim oda ia.

Governor blong Reserve Bank blong Vanuatu, Simeon Athy, i talem se bisnis ia hemi illegol long kaontri mo hemi no save operate olsem wan financial institution.

Hemi talem se hemi no fes scheme we i operate we plante people i lusum mane, hemi askem pablic blong stap away long ol scheme ia.

“Mi write long scheme ia long wik ia mo wonem olgeta se bisnis aktiviti ia i no folem loa,” Mr Athy i talem long VBTC Nius.

“Hemi no folem loa blong wan banking bisnis i operate witaot wan propa banking laesens long regulator.

“Long beis ia i kat brij long seksen 6 mo 9 blong financial institution act.

“Reserve Bank blong Vanuatu leta ia i askem bless to be blessed mani scheme blong stop kwiktaem.”

Mr Athy i talem se long 7 dei ia oli mas givim bak mani blong ol pipol we oli kam putum mani.

“Scheme ia hemi pem ol existing investor wetem olm ani we oli kolektem long ol pipol we oli ko deposit mo taem mani i nomo kat, scheme i foldaon mo leko ol pipol we oli bin trae had blong swet mo savem mani blong olgeta,” Mr Athy i talem.

“Ol scheme olsem i set ap blong stilim pipol mo hemia i folem ol pas exampol.

“Mi askem pipol blong no ko kolosap long ol scheme olsem.”

Director blong Financial Intellgience Unit, Floyd Ray Mera, i talem se folem ol investikesen we oli mekem i ko long bisnis ia oli faenem se i nogat olgeta propa guidline mo polisi inples.

Hemi talem se oli bin instraktem bisnia ia blong putum ol guideline ia mbe hemi no komplae.

Director Floyd Mera  i talem se bisnis ia i brekem Bisnis licence act Financial Institutional Act, Reserve Bank Act mo Anti-Money Laundering mo Counter Terrrorism Financing Act.

Afta long ol disisen blong Financial Intelligence Unit, Reserve Bank blong i putum wan notis blong bisnis blong i stopem operation blong hem. Hemi ova tri wik nao we bisnis hemi bin open long pablik mo ova 300 pipol i paticipet long hem.

VBTC Nius i witnessem fulap pipol i komplen mo r m nogud mo oli kwestenem from wanem ol otoriti i wantem karem aot scheme ia.

I kat kwesten hemi stap se from wanem ol authority oli bin isuem wan bisnis lisens long fes ples mo Vanuatu Financial Service Commission i rijistarem olgeta witaot propa jek.

Governor blong Reserve Bank, Mr Athy, i talem se hemia i shoem se i kat some gab long ol loa blong Vanuatu.