Bot rejistresen long Penama

Noten Division Ofis blong Maritime Regulator bae i stap long Penama long 5 kasem 15 October blong rijista, mekem survey mo inspektem ol smol sea vessel.

Wan Marine Inspector long Ofis, Manaseh Togagi, i talem se wan tim bae i stap long Pangi, saot Pentecost, Bwatnapi mo Loltong long not Pentecost long taem ia.

Tim bae i kondaktem tu ol survey mo inspeksen; kondaktem rijistresen long Asanvari long Maewo, Lolowai, Waluriki, Sakao mo Nduindui long Ambae long ol semak deit.

Mr Togagi i talem se hemi impoten blong ol bot owna mo ol bot skipa i mitim Maritime Regulation tim long taem ia blong rijistarem ol bot mo tekem lisens mo sefti trening.

Hemi talem se ol bot owna bae oli nid blong pem wan totol blong VT36,325 blong tri difren rijistresen fi blong karem wan laesens.

“I kat wan aplikesen fi blong VT575, wan rijistresen fi blong VT17,250 mo wan survey fi blong VT11,500 we i add ap long VT29,325,” Mr Togagi i talem.

“Bae mifala i trenem tu ol skipa o ol kapten blong bot mo bae mifala i printem mo isuem ol laesens blong olgeta long taem ia.

“Ol laesens blong ol skipa hemi VT7000 we i minim se ol fi ia i rikwa blong ol bot owna i rijistarem ol vessel mo tekem wan laesens we i add ap long VT36,325.

Mr Togagi i talem se rijistresen mo aplikesen fi bae i kavarem ap ol owna blong bot blong faev yia.

Mbe ol survey fi bae i nid blong oli pem anuoli taem ol inspekta i kam blong jekem se ol smol banana bot ia oli sef blong travel inkludum olgeta we oli kat ol stret laef saving apliens olsem ol laef jaket.

Mr Togagi i talem se taem wan owna blong bot i pem ol ol stret fi ia, ol inspekta bae i putum wan stika blong Maritime Regulator long bot blong soem se i sef blong travel mo i kat raet apliens blong sefti.

Hemi askem ol bot owna long Penama Provins blong redi long mani blong fi blong olgeta long taem blong rijistresen proses bifo oli kam wetem ol skipa mo ol kapten long ples blong rijista.

“Hemia blong mekem sua se ol bot owna mo ol kapten i tekem ol stret infomesen mo trening long taem blong rijistresen proses mo blong mekem i isi long mifala blong ranem ol futja survey,” Hemi talem.

Mr Togagi i talem se sapos i kat taem, tim bae i mit wetem Penama Provincial official blong sherem infomesen long rijistresen program blong ol smol banana bot.

Smol vessel rijistresen i bin stap ko gud long Sanma Provins.

Wan Marine Inspekta long Noten Division Ofis blong Maritime Regulator, Joseph Melip, i talem se i kat sam bot owna nomo we oli no komplae wetem rul ia.

Hemi talem se detention oda i bin isu i ko long ol bot owna mo oli no alao blong provaedem seves blong transpot.

Mr Melip i talem se sapos ol bot owna, skipa o ol kapten i brokem oda ia, polis i save holem taet ol smol bot we i involve.

Hemi wonem ol bot owna long Sanma Provins we oli no rijistarem yet ol bot blong olgeta blong oli kam fowod mo rijista blong i kat pruv se ol bot blong olgeta i sef mo sea-worthy.

Eli long nekis yia, afta we ol rijistresen i komplete long Penama Provins, ol inspekta bae oli muv i ko long Torba provins blong karem aot rijistresen longwe.

Rijistresen blong ol smol craft bot o ship i rikwa anda long Maritime Sector Regulatory Act blong 2016.

(Visited 142 times, 1 visits today)

About The Author

You might be interested in