Buk i lonj blong talemaot ol storian blong ol woman long Public Service

Wan fes eva buk blong ol women long Public Service i rilis long Ofis blong Prime Minister long Port Vila hemia long wik ia.

Deputy Team Lida blong Balance blong Pawa, Jennifer Kalpokas Doan, i talem se buk ia hemi talemaot storian blong 43 woman long ol difrent wok spes blong kavman we oli kam blong sharem ol inspiring toktok abaot journey blong olgeta.

Hemi talem se puk ia hemi blong help jensem lukluk blong ol pipol abaot ol woman.

“Mein tinktink blong buk ia hemi blong jalenjem ol tinktink blong ol pipol long hao oli lukluk ol woman,” Mrs Doan i talem.

“Hemia i blong alaoem ol pipol blong oli stat kat tinktink blong akseptem mo alaoem ol ples blong ol woman long ol society.

“Hemi no blong tokbaot ol hae position we ol woman ia oli holem long ofis mbe wanem oli playem blong bildim society mo nation blong yumi Vanuatu.

“Long ol taem i kam, yumi wantem se bae yumi luksave wok blong ol woman mo putum olgeta long wan position blong wan woman long wan society.

“Mo bae yumi save luk ol pipol i votem olgeta i ko long Palamen.”

Director General blong Ministry blong Internal Affairs, Cherol Ala, i wan long olgeta woman we storian blong hem i stap insaed long niu buk ia.

Hemi talem se hemi bin startem wok blong hem olsem wan Physical Planning Ofisa long Ministry blong Internal Affairs 30 yia i pas.

“Mi mi wan long ol fes woman we mi kam olsem wan Director General long Public Sevice long yia 2016,” Ms Ala i talem.

“Mi glad tumas blong save talemaot storian blong mi insaed long buk ia.

“Hemi 33 yia nao blong journey blong mi mo mi wantem enkarejem ol futja generation, ol boy mo kel se oli mas biliv long olgeta wan mo kat faith long Papa God oltaem.”

Mrs Doan i talem se wokbaot blong olgeta blong putum togeta buk blong National Builders oli faenem se ova 50 per cent blong ol woman oli stap insaed long public service.

“Hemi wan tinktink we i kam long Balance of Power mo Kavman blong Vanuatu mo Australia i sapotem,” hemi talem.