Call blong ol Ni Vanuatu film meka blong entarem Namatan Festival

Long yia ia, unik item we bae i stap long ol film blong Namatan Short Film Festival hem i namba ‘40’ blong selebretem 40 yia Independens blong Vanuatu.

Australian High Commissioner long Vanuatu, Sarah de Zoeten, i anaonsem long ofisel opening blong 2020 Namatan Short Film Festival long Mandei.

Wan long ol kondisen blong entri long Namatan Short Film Festival hem i everi film oli mas inkludum wan ‘unik item’. Hem ia hem i blong pruvum se ol film ia oli bin mekem long ol specific yia blong festival.

Ol film meka oli gat kasem 19 Oktoba 2020 blong sabmitim ol film blong olgeta.

“Mi glad blong talem se long yia ia Namatan Short Film Festival bae hem i stap long las dei blong wan wik blong VBTC Christmas in the Park event long December mo mi save se bae hem i fantastic,” Ms Zoeten i talem.

Commissioner Zoeten i talem se idea blong kriatem Namatan hem i blong ofarem wan opojuniti blong ol Ni-Vanuatu blong ekspresem ol idea blong olgeta , blong serem vision mo blong serem kriativiti tru long film.

“Hem i blong ol odians tu oli tekemaot own mesej blong olgeta long wanwan stori.”

Naoia long namba nine yia, Ms Zoeten i talem se hem i praod blong talem se festival hem i stap gro strong.

Namatan hem i kam wan long ol saksesful festival blong yia, we i karem ol orijinol film long ol pipol blong Vanuatu i ko long ol smol skrin akros long Vanuatu.

Long everi yia festival ia hem i kasem tausen pipol long top kasem botom blong Vanuatu. Hem i kasem ol pipol tru long pablik screening long ol scul, komuniti mo tru long finale event blong hem.

Ms Zoeten i talem se las yia long finale event long Port Vila nomo, ova long 5000 pipol oli bin wajem ol film ia.

“Blong wajem ol yangfala woman mo man oli entarem wan rum wetem excitement blong wajem ol film we oli produsum, hem i wan gudfala experians,” hem i talem.

Ms Zoeten i talem se kwaliti blong ol film ia oli bin impruv bigwan everi yia taem plante pipol i gat akses long teknoloji blong produsum ol film ia mbe tu ol skrip raeting, akting mo saon prodaksen oli impruv.

“Mo mifala i praod tumas se Namatan hem i bin help blong lonjem ol profesonal karia blong ol privias kontestan, sam long olgeta oli stap wok naoia long VBTC.”

Chief Executive Officer blong VBTC, Francis Herman, i talem se Namatan hem i wan impoten tingting blong Vanuatu mo hem i wan nomo olsem long Pacific we i taketem krasrut.

“Long mifala, Namatan hem i sevem wan veri useful pepes from hem i promotem lokol talent mo hem i enkarejem prodaksen blong lokol talent,” Mr Herman i talem.

Hem i talem se hem i impoten tu se Namatan hem i use blong divelopem lokol kapasiti, teknik blong produsum ol film, shot o long mo blong enkarejem ol Ni-Vanuatu we oli wantem ko insaed long film indastri.

Mr Herman i talem se Namatan hem i kivim janis tu long VBTC blong stokpael long lokol kontent.

“Long mifala, mifala bae i stap komited blong sapotem Namatan. Mifala bae i stap komited blong mekemsua se prodaksen long yia ia hem i blong hae kwaliti. Mo tim blong mifala, stat long Hed blong Television, Rick Malao, mifala i stap komited blong asistim o provaedem sam advaes i ko long ol posibol film meka we oli wantem blong leftemap skil blong olgeta.”

Namtan Short Film Festival hem i posibol tru long patnasip bitwin Australian High Commission mo VBTC wetem ol sponsa blong hem, Digicel Vanuatu mo ANZ Bank blong Vanuatu.

Ol top film meka blong Vanuatu bae oli winim VT 200,000 we ANZ Bank hem i sponsarem. Seken mo third ples wina bae oli tekem hom ol brand niu smat fon we Digicel i sponsarem. Blong gat janis blong winim ol eksaeting praes ia, sabmitim shot film blong yu i ko long Vanuatu Broadcasting mo Television Corporation bifo en blong bisnis long Mandei 19 Oktoba 2020. Blong kwalifae, ol film i mas bi bitwin wan kasem seven minit long mo i mas inkludum 2020 Namatan unik item, ’40’.

Entri hem i fri mo isi. Moa infomesen yu save kasem long Australian High Commission website long https://vanuatu.embassy.gov.au/events.html

Blong moa nius mo event, folem Australian High Commission Vanuatu Facebook page long https://www.facebook.com/AustralianHighCommissionVanuatu/ mo VBTC Facebook page long https://www.facebook.com/vbtc.vu/

Namatan Short Film Festival hem i stat off long 2012 tru long patnasip bitwin VBTC mo Australian High Commission.

 

(Visited 36 times, 1 visits today)

About The Author

You might be interested in