Cattle projek i introdus long Erromango

Ova 200 buluk i ko long Erromango blong inkrisim namba blong buluk long Vanuatu.

Director General long Ministry blong Livestock, Moses Amos, i talem se Erromango i kat bigfala land mass kompea long ol narafala aelan mo hemi gud blong yusum blong bridim moa buluk.

Hemi talem se niu aproj long projek ia i blong ol fama long Erromango i mas soem intres mo komitmen blong help adresem sotej blong buluk long kaontri.

“Yumi tagetem 500,000 herd blong buluk long yia 2025 from beef mit blong yumi hemi wan long ol best long Wol,” Mr Amos i talem.

“Ol buluk ia we bae yumi bridim, hemi ol mama buluk we yumi wantem impruvum breed blong olgeta tru long ol impot semen we yumi tekem.

“Yumi stap plan blong namba tri bigfala aelan long Vanuatu bae i kam wan long ol mein saplaia blong buluk long fiuja.

“From fulap long ol prime cattle land blong yumi long Vanuatu i kam ol residential eria o ples we pipol i liv long hem olsem Efate mo Santo tu mo hemia nao i wan jalenj.

Wan fama blong Erromango, Tomker Netvunei, i talem long VBTC Nius se bae oli jensem fokas long buluk.

“Mi tink se hemia i wan gudfala step we kavman i mekem from long past, mifala i bin sendem 600,000 tan skin blong buluk i ko long England mo hemia i stap long history buk blong agriculture,” Mr Netvunei i talem.

“Yumi ol man Vanuatu i save se Erromango i popular longtaem long timba mo sandalwood sins 1800.

“Mbe mifala i glad from projek blong buluk i kasem mifala.”

Steve Boe, Senior Livestock Ofisa long Dipatemen blong Livestock, i talem se hemi impoten blong ol fama we oli pat long program ia, oli mas interes blong lukaotem buluk.

“Wan long ol criteria hemi blong ol fama long ol aelan i mas kat ol gud fanis, gudfala kakae, wota mo shed blong buluk i stap long hem,” Mr Boe i talem.

“Sapos ol fama i interes bae oli saenem wan kontract wetem Dipatmen blong Livestock.”

Cattle Restocking program ia i stap long Malekula, Santo, Epi mo Ministry blong Livestock bae i introdusum tu long Emae, Pentecost mo saot Tanna i no longtaem.

 

 

 

 

 

 

 

 

 

 

 

 

 

 

 

 

(Visited 91 times, 1 visits today)

About The Author

You might be interested in