Chinese COVID vaccine i kasem Vanuatu

China Kavman i handem 20,000 dos blong Sinopharm vaccine long Kavman tete hemia long Convention Center, Port Vila.

COVID Vaccine ia China i produsum mo World Health Organisation i bin apruvum i no longtaem.

Prime Minista, Honoroble Bob Loughman, i talem tankiu bigwan long People’s Republic blong China from sapot we hemi kontinu blong kivim long taem blong COVID-19 ia.

“Kavman bae i kontinu blong toktok wetem ol developmen patna blong hem long hao hemi save karem moa vaccine blong mekem sua se 166,500 populasen we age blong olgeta i anda 18 yia i save kasem stik meresin mo stap sef long virus ia,” Prime Minista Loughman i talem.

Ambassador blong China long Vanuatu, His Exellency, Zhou Haicheng, i talem se i bin tekem sam manis blong negociate wetem kavman blong China blong tekem vaccine ia i kam long Vanuatu.

His Exellency, Haicheng, i talem se China i soem komitmen blong hem blong sapotem Vanuatu mo economic recoveri long taem we Wol i stap long kraeses.

Director blong Public Health, Len Tarivonda, i talem se afta long roll aot plan we Ministry blong Health bae i mekem abaot vaccine ia, bae oli jes talem deit blong pipol i save tekem.

“Yumi mas save se ol COVID vaccine ia hemi no wan mas blong pipol i tekem; Yumi mas mekem awenes blong pipol i save long hem blong oli kam fowod blong tekem,” Director Tarivonda i talem.

“Bae yumi mekem olsem se ol pipol long Efate we oli wantem tekem stik meresin blong Astrazeneca vaccine bae oli ko pas long Convention Center.

“Mo olgeta we oli wantem tekem Sinopharm vaccine, bae yumi jusum wan moa ples we bae oli ko tekem stik long hem.

“Yumi mas save tu se capasiti blong health tu i limit so yumi mas plan gud from.”

Wan lokol, Milroy Cainton, i talem se bae hemi tekem dos blong Sinopharm from hemi wan bigfala sakses raon wol.

“Mi no talem se Astrazeneca vaccine we i kam fes wan long Port Vila, i nogud from evri vaccine ia World Health Organisation i apruvum,” Mr Cainton i talem.

Vanuatu mo China i join blong faet akensem virus ia wetem ol 20,000 dose plus 22,400 syringes i kam long pipol blong Vanuatu.

Ministry blong Health i talem se bai i kam out samtaem nekis wik long roll plan blong hem long Sinopharm vaccine.

 

 

 

(Visited 166 times, 1 visits today)

About The Author

You might be interested in