Christmas in the park 2020 bae i stap long Saralana park

Vanuatu Broadcasting mo Television Corporation i anaonsem se anual even blong Christmas in the park long yia ia, bae i tekem ples long Saralana Park.

Spokesperson blong VBTC, Lilon Bongmatur, i talem se folem bigfala populariti blong even ia, komiti blong even ia, i luk se venue we i stap hostem even ia long hem everi yia i kam moa smol we hemi long eria blong Seafront.

Hem i talem se wetem hemia, mifala i tinktink blong movum even ia i ko long Saralana Park blong save tekem plante pipol blong save kam watjem ol activiti.

“Komiti hemi rili wantem luk event ia hemi kam wan event we ol famili i kam tuketa long unity blong selebretem spirit blong christmas long wan sef, fun mo loving envaeromen,” Mrs Bongmatur i talem.

“Even ia bae i tekem ples long namba 2 kasem 5 December.

“Christmas in the Park long yia ia, bae i ko tuketa wetem faenol blong Namatan Film Festival, we High Commission blong Australia bae i hostem long namba 5 Disemba, mo bae i finis wetem displei blong fireworks.”

Ms Bongmatur i talem se yia ia, 2020 hemi wan strong yia blong yumi everiwan from Saeklon Harold mo COVID-19 pandemic, mbe mifala i biliv se i stil kat nid blong selebreitem spirit blong chrismas, mo endem yia ia wetem hapines.

Hemi talem se, komiti i disaed tu blong katemaut ol kompetisen we oli bin stap holem long taem blong event ia, mo mekem i moa fokas blong selebretem spirit blong chrismas, we hemi mein rison from wanem christmas in the Park i bin stat long 2009.

“Long even ia, bae ol organisa i holem ol difren kem blong ol piknini, mo ol piknini we oli tekem pat bae oli kat ol present,” Ms Bongmatur i talem.

“ Ol kem ia bae hemi inkludim egg mo spoon reis, jamp long bak reis, peintem ol fes, tug-of-war o pulum rop, mo plante nara kem blong ol piknini.

“Bae i kat wan ples tu we bae oli bildim olsem menja blong soem birth blong Jesus, mo ol visita bae oli save visitim mo tu wan bikfala Christmas tri long Saralana Park blong olketa pipol i save putum ol presen long hem blong helpem ol piknini long ol komuniti we oli no kat janis blong kat wan present long taem blong christmas.”

Ms Bongmatur i talem se long tru aot long even ia long ol evening, bae i kat ol chrismas karol mo ol skits we ol jej mo ol youth grup bae oli pefomem blong highlightem even ia.

Hemi talem se bae i kat ol stol tu long taem ia, mo bae oli stat salem ol stol i no long taem.