Climate change i afektem lokol kakae

Ol mama blong Efate i blemem efekt blong climate change long ol kakae we oli salem long Market.

Ol mama ia i talem se oli no moa havestem gud ol kakai long garen olsem long ol yia we i pas.

Folem climate change long sam ples long Not Efate, graon i kam moa dry, plante ren, bigfala wota i ron, mo i mekem se graon i no moa rij blong kakai i save gro gud.

I kam klia nao we samfala kakai we ikam long maket, oli no bigwan tumas mo oli no fulap olsem fastaem.

Susan Charley, wan mama blong Malafau vilij long Not Efate, hemi serem experience blong ol mama long vilij ya, long olsem wanem oli no moa havestem gud yam long garen blong olgeta.

“Mifala planem ol yam blong mifala, be oli no moa olsem fastaem,” Ms Charley i talem.

“Taem mifala havestem, mifala expektem se bai oli bigwan, be oli no moa olsem fastaem. Oli smol nomo.

“From tumas ren, mekem se yam i no moa save fatfat.”

Hemi talem se fastaem wan garen i save havestem ova long 100 yam. Be long yia ya, wan garen i havestem samwe long 50 yam nomo.

Ms Charley i tokbaot tu aelan kabij we climate change i afektem.

“Wan samting tu mifala luk long ol garen blong mifala, hemi ol aelan kabij blong mifala. Ino taem blong lif I drae, be i drae nao. From tumas ren i mekem graon i wetwet tumas.

“Mo tu taem blong kabij i stap givim leaf yet, be i no moa givim lif from i stap long wota longtaem,” Ms Charley i talem.

Ms Charley i talem tu se nating long traehad blong planem wan bigfala garen, be oli mas praesem ol produs blong olgeta, folem saes blong kakai nomo.

Wan nara mama blong Epau vilij, Jenny Jenery hemi tokbout olsem wanem bigfala wota we i ron, i spoilem ol fish long solwota.

“Riva i ron mo i berem ol hol we ol fi soli silip long hem, mekem se i afektem olgeta; Ples i hot tumas mekem sam fi soli ded mo oli flot i kam so. From sofmat i kavremap ol ples we oli bin stap haed long hem,” Ms. Jenery I talem.

Hemi talem tu se bigfala wota we i ron long ol crik i karemaot ol wota kris mo i spoilem ol wota taro long garen.

Ol mama ya oli gohed mo talem se plante long ol garen blong olgeta, i fulap long wota mo i had blong oli faenem ol gudfala ples blong plan long hem.

Mo tu samting ia i afektem bigwan seil blong olgeta long maket.

By Tiffany Baldwin, VBTC Climate Change Reporter.

 

(Visited 177 times, 1 visits today)

About The Author

You might be interested in