COM i no apruvum international kampani -Citizenship

Council blong ol Minista i no apruvum disisen blong Vanuatu Citizenship Commission blong enkejem wan intanasonal kampani blong maketem Citizenship Investment Program.

Jeaman blong Citizenship Komisen, Ronald Warsal, i bin saenem kontrak wetem CS Global long en blong las yia.

Prime Minista blong Vanuatu, Honoroble Bob Loughman, i talem long wan Press rilis se agrimen wetem CS Global kampani bae i no help blong adresem due diligens blong citizenship program.

Prime Minista Loughman i talem se Council blong ol Minista i neva endosem agrimen ia.

Hed blong kavman i pointemaot se Council blong ol Minista i bin agri nomo se hemi impoten blong gat wan indipenden mo expiriens intanasonal kampani long citizenship mo imigresen program we bae i helpem kavman i impruvum program ia.

Prime Minista Loughman i asurem European Union se Vanuatu kavman i tekem i serious step blong ristorem bak trast long rilesensip we hemi gat wetem hem long visa waiva arenjmen.

Hemi welkamem demand blong European Union blong i gat amendmen o jenis long kavanans blong citizenship program.

Mo hemi se kavman blong hem i hop blong stretem ol konsen ia insaed long taem frem we European Union i kivim we hemi tu wik.

Vanuatu Financial Intelligence Unit i bin rilisim wan steitmen blong talem se oli no agri long disisen we Citizenship Ofis i mekem blong saenem kondrak wetem tu international agency blong mekem marketing mo Due deligents jek blong program.
Director blong Financial Intelligence Unit, Floyd Mera, i talem se entiti ia bai kostem kaontri bigfala mani long wan yia we hemi araon VT6 billion.

 

(Visited 230 times, 1 visits today)

About The Author

You might be interested in