Consolteisen blong Juvenile bill i kohed

Vanuatu bai i kat i no longtaem loa blong ol underage we oli involve long ol criminal aktiviti.

Committee we i stap wok long loa ia i aim blong putum bill i ko long parliament sitting long November.

Director blong Correctional Service, Johnny Marango, i talem se bill ia we oli singaotem Juvenile Law hemi aim blong protectem ol age grup blong 12 kasem 18 yia we oli involve long ol criminal aktiviti.

Mr Marango i talem se judiciary blong Vanuatu hemi save dil spesifikli wetem olgeta mo oli kat wan own prison blong olgeta we ol authorities, oli save helpem olgeta blong oli save rehabilitate mo tu blong olgeta i kat wan gudfala life after we oli servem sentens blong olgeta.

Hem i talem se namba blong ol yut we oli involve long ol criminal activiti hem i stap kam antap bigwan.

Mr Marango i talem se i no longtaem i pas correctional service hemi bin rimandem wan 13-yia-old boe from fasin blong rape.

Director Marango i talem se taem we oli putum boe ia i ko long prison long Port Vila hemi nomo wantem toktok mo hemi rifuse blong kakae.

Hem i talem se plante nara yangfala oli riakt semak, plante from oli no fil safe long prison we i kat ol bigman long hem.

“Plante oli luk center ia olsem hem i wan koreksenol fasiliti. Juvenile center ia bae i kam olsem wan rehabilitation senta long hao mifala i save helpem yangfala ia blong hem i kam insaed blong hem i save rialisem potential blong hem olsem wan gudfala citizen blong Vanuatu,” Mr Marango i talem.

Hem i talem se rape mo drugs hem i namba wan criminal activiti we ol yangfala o underage oli kasem sentencing from long Vanuatu.

Long Vanuatu 60 pesen blong ol juvenile kes, oli sentence long komuniti wok, be rehabilitation hem i wan bigfala samting we kaontri hem i nogat.

Juvenile Justice Working Committee hemi stap mekem ol consultation naoia abaot bill ia we oli wantem pasem long Parliament long November.

Kavman hemi kivim VT40 Million finis blong bildim fes prison haus blong ol juvenile ia long Luganville Santo.

Mr Marango i talem se oli saenem contract wetem KD Enterprise long manis ia blong stat buildim fasiliti ia.

Long Port Vila Director Marango i talem se nekosiasen hemi stap ko hed yet blong securim pis kraon blong bildim wan semak fasiliti.

(Visited 11 times, 1 visits today)

About The Author

You might be interested in