COVID -19 komuniti transmisen apdeit-Monday

Kondak tracing infomesen long fes COVID-19 Outbrek long Port Vila bae i kamaot long Monday.

Public Relation Ofisa blong Kavman, Fred Vurobaravu, i konfemem.

Mr Vurobaravu i talem se infomesen bae i kamaot long 2pm tumoro.

“Advaes long Ministry blong Health se bae apdeit infomesen bae i availabol tumoro,” Mr Vurobaravu i talem.

“Naoia we yumi stap toktok olgeta ofisa i stap kontinu long operation blong kondak tracing long ol eria long Port Vila. Naoia hemi had blong talem aot stret amas pipol i kasem virus. Olgeta pipol ia naoia oli stap long kwarentin long Iririki aelan mo swap tes hemi stap kontinu naoia blong yumi save moa long infomesen long Monday.

“Yumi askem pipol blong lisen long ol awenes we Vanuatu Police Force i stap ko raon mo putum aot long komuniti. Pipol i mas folem oltaem ol hygience rul blong COVID-19(washem han wetem sop mo wota).”

Lida blong Opposition, Honoroble Ralph Regenvanu i bin mekem wan kol tu blong Kavman i kamaot klia wetem ol kondak tracing operation blong pipol i save long wanem stret blong mekem.

“Kavman i nid blong givim aot moa infomesen long kondak tracing we i stap hapen naoia,” Mr Regenvanu i talem.

“Hemi impoten blong mifala i mas save ol wea ples stret from yumi stap long alert level 2.  Mifala i mas save se hu nao i kasem mo ol wanem eria nao mifala i save avodem from sapos no hemi no wan poin blong mekem operation ia from pipol i nosave wea ples hemi afek. ”

Police hemi infomem pablik long curfew ol COVID-19 protocol blong folem.

Awenes ia hemi tekem ples long ol bigfala komuniti long Port Vila

National Coordinator blong Crime prevention, Samson Garae, i biliv se pipol oli awea long ol rul blong folem.

Mr Garae i talem se preisem ol komuniti we oli mekem efot blong mekem ol rod blok mo pratisem ol COVID-19 mesa.

Mr Garae i kol long pablik blong rispektem muvmen we i stap hapen long 6pm kasem 6 o’ klok long moning.

 

 

 

 

 

(Visited 958 times, 1 visits today)

About The Author

You might be interested in