COVID alert ristriksen dikris

Health i talem se dikris long ol COVID alert ristriksen hemi from namba blong ol kes i ko daon, ol pipol i nomo hospitalised mo vaccination reit i gud.

Health i rikodem 73.5 % blong population i tekem tu stik blong COVID. Mo 81 % oli tekem wan stik nomo.

Director General blong Health Ministry, Russel Tamata i talemaot long Health tok long wik ia se hemi wan wei tu blong pripea from International boda opening long July.

“Deit blong opening blong boda we Kavman i putum i stap olsem we i stap, mo long tu wik taem, bae Health Advisory Committee blong COVID bae i lukluk long ol ristriksen blong rilaxem moa i ko kasem long July 1st so sapos eni tink i hapen long manis June i ko bambae yumi save pripea blong tagelem,” Mr Tamata i talem.

Mr Tamata i talem se health i glad long wok tugeta long COVID pandemic ia blong mekem se July ol samting i save kambak nomol.

“Yumi talem tank yu long ol prea we i bin stap hapen sins outbreak kasem naoia,” Mr Tamata i talem.

Mr Tamata i talem se naoia komiti i advaes blong mekem ol disisen beis long ol aelan mo nomo provins.

Long Tuesday wik ia, Minista blong Health, Bruno Leingkone i saenem ol niu oda blong katem daon COVID alert long Torres, Pentecost mo Sanma i ko long rikavari level 2, mo Tanna mo Erromango long Alert Level 3.

“Long Torba provins, Vanualava mo Gaua hemi muv i ko long rikava level 2,” Mr Leingkone i talem.

“Torres grup olsem Hiu, Loh, Tegua mo Metoma aelan i muv i ko long rikavari level 1. Mo ol nara aelan long Banks grup i stil stap long rikavari level 1. Long Tafea provins, aelan blong Tanna mo Erromango i stap yet long level 3 from hae namba blong kes.  Aneityum, Aniwa mo Futuna i stil stap long rikavari alert level 1 from i nogat eni COVID kes we oli rikodem. Long Penama provins, Pentecost i muv i ko long rikavari level 2, Ambae mo Maewo hemi stil stap long alert level 1. Long Shefa Provins, Efate wetem ol Offshoa aelan, Epi/Tongoa wetem Sherpherds grup oli stap long rikavari level 1. Mo long Sanma, Santo wetem ol offshoa aelan blong hem mo Malo i muv i ko long rikavari level 1.

“Ol aelan we oli muv i ko daon long ol alert i min se kavman i tekem aot sam ristriksen mo ol aktiviti i sud ko hed nomol(Olsem ol skul).”

Minista Leingkone i talem tu se oli bin sendem sam test i ko ovasi i ko long Melbourne, Australia blong faenemaot wanem kaen type blong COVID Vanuatu i kat.

“Risal hemi soem se long Vanuatu yumi kat COVID-19 variant omicron we hemi sub-dividem BA1 mo BA2 we i stap ko raon naoia long Vanuatu. Bae mo infomesen i kamaot,” Minista Leingkone i talem.

Mr Tamata i talem se hemi wan gud nius blong Vanuatu.

“Taem mifala i faenem aot se yumi kat type blong variant ia, wanem moa bambae yumi wari long hem,” Mr Tamata i talem.

“Ol nara wan we oli stap naoia yumi save se hemi weak be oli spread kwik be oli no strong olsem BA1.”

Be Minista Leingkone i talem se pipol i mas ko hed blong folem ol COVID rul blong washem hand, werem mask taem ko long ol pablik eria mo meintenem social distens.

Curfew blong 6pm kasem 6am i aplae long ol eria we alert level 3.

 

 

(Visited 236 times, 1 visits today)

About The Author

You might be interested in