COVID crew bae oli berem long Vanuatu

Vanuatu bae i berem fes patient wetem COVID-19 long Port Vila Cemetry long Efate.

Kes ia hemi boda kes blong Philipino crew blong ship gas, Inge Kosan, we i bin kam long Vanuatu long eli April mo oli faenem bodi blong hem i flaot i ko shoa long Pango eria long Efate.

Spokesperson blong Covid 19, Russel Tamata, i talem long VBTC Nius se bae oli disaed long wan deit blong berem hem.

“Bodi blong leit crew ia, Vila Central Hospital i bin rilisim aot finis,” Mr Tamata i talem.

“Mbe long wik ia National COVID-19 Taskforce bae i mit blong diskasem mo developem wan health protocol blong yusum taem yumi berem leit crew ia.

“Semfala protocol ia bae yumi yusum long eni COVID ded long futja.”

Director blong Foreign Affairs, Yvon Basil, i talem se plan hemi blong sendem ded bodi i kobak long hom kaontri blong leit crew ia long Philipines.

Hemi talem se jalenj blong sik COVID-19 i mekem se plante kaontri oli klosem ol boda blong olgeta.

“I bin gat strong negosiasen we kavman i bin gat wetem consul blong Philipines long Vanuatu, Florentino Serrano long hao nao bae oli save disposem bodi blong engineer ia,” Mr Basil i talem.

“Resen blong boda lok daon i mekem se ol famili i disaed blong yumi berem famili blong olgeta long Vanuatu.

“Ol famili i rikwestem blong yumi mekem buriol ia i live long fesbuk blong oli save wajem from oli stap longwe long Philipines.

“Mo hemia nao plan we i stap.”

Ded bodi blong leit philipino crew ia i spendem kolosap wan manis finis long aos ded long Vila Central Hospital.

(Visited 707 times, 1 visits today)

About The Author

You might be interested in