Tu positiv COVID kes long boda

Vanuatu i konfemem tu niu positiv boda kes blong COVID-19.

Praem Minista blong Vanuatu, Honoroble Bob Loughman, i anaonsem tufala kes ia long Mandei.

Aot long 18 pasenja blong wan flaet we i kam long New Caledonia long Oktoba, tu i bin tes positiv long COVID-19.

Praem Minista blong Vanuatu, Honoroble Bob Loughman, i talem se tufala ia i no soem eni saen blong COVID mo bae tufala i transfe i ko long COVID-19 isolation wod.

Praem Minista Loughman i talem se ol pasenja ia i bin tes negativ long COVID-19 long Noumea mo helt long New Caledonia i bin provaedem helt kliarens blong olgeta bifo oli kam long Vanuatu.

“Long Sandei afta long tes, tu aot long 18 i tes positiv mo Ministri blong Helt i stap kondaktem ol nara tes long ol nara pasenja,” Praem Minista Loughman i talem.

“Mbe aotkam blong ol nara testing bae i availabol, naoia ministri blong helt i stap kondaktem tracing long olgeta we oli wok long taem blong flaet; eni wan we i kat klos kontak bae oli ko long kwarentin.

“Yumi nosave yet se taep blong COVID ia hemi delta variant o no, wetem asistens blong World Health Organisation bae oli sendem ol tes i ko ovasi mo bae i tekem sam taem blong tekem bak tes.”

Long 25 October, Vanuatu i muv i ko long alert level wan we i minim se i kat kes long boda mbe i nokat COVID-19 kes long komuniti.

“Mi wantem ripitim hem ia, se Vanuatu i nokat eni COVID kes long komuniti,” Praem Minista Loughman i talem.

“Evri pasenja ia we oli kam ia oli bin folem evri rikwaemen blong health kliarens blong kam long Vanuatu mo oli bin ko tru long kwarentin.”

Praem Minista Loughman i talem se, “Vanuatu i bin sakses blong kontenem ol COVID keses long kwarentin sins pandemic i stat, wetem hem ia yumi wantem askem pablik blong stap kwaet mo folem advaes blong ministri blong helt.”

“Evri wan i mas kontinu blong wasem han wetem sop mo wota; no tajem ae, nus mo maot, mo stap long haos sapos yu sik,” Praem Minista Loughman i talem.

Praem Minista Loughman i askem olgeta we oli no risivim yet COVID vaksin blong mas ko tekem blong i save protektem olgeta.

“Mi apil long ol lida long komuniti mo long jej blong enkarejem pipol blong ko fowod mo tekem vaksin,” Praem Minista Loughman i talem.

“Mi askem tu blong pablik i no spredem ol kiaman infomesen i ko long pablik. Kavman tru long Ministri blong Helt i askem media mo pablik blong rispektem privacy blong ol pipol we oli tes positiv blong helpem ol famili.”

Kavman i advaesem pipol blong ko tekem infomesen long fesbuk pej blong health promotion.

“God bae i blessem yumi evriwan,” Praem Minista Loughman i talem.

Nius blong ol positiv COVID-19 kes ia long Port Vila i kosem panic shopping long Port Vila. Plante pipol long Port Vila i ras in long ol stoa mo supa maket blong pem ol samting.

Long nambatu Au bon Marche, ol pipol i shop wetem ol bigfala shopping bag mo ol crowd i bitim nomol long ol Mandei aftenun.

Ol pipol i stat tu blong werem fes mask mo ol washing hand station i stap in ples long foret blong ol bisnis haos bifo Kavman i mekem toktok long apdeit blong COVID-19.

Araon long 96,536 pipol long Vanuatu i tekem vaccine naoia.

Mo hemia hemi 46 per cen blong eligible population blong Vanuatu.

Hemia i inkludum olgeta long Sanma, Tafea mo Malampa provins.

Long Shefa alone, i gat wan total population blong 57,103 pipol, 71 per cen i tekem fes dose mo 47 per cent blong population ia i fuli vaccinate.

Long Port Vila, i gat wan population blong 31,095 pipol, 67 per cen i tekem at least wan dose mo 43 per cen i fuli vaccinate.

Long Sanma, we hemi seken provins we kavman i rolem aot vaccination long hem, i lukum se turn aot blong hem i gud tumas, hemia wetem 28, 497 pipol, 73 per cen i tekem at least one dos mo 13 percent i fuli vaccinate

Long Tafea, wetem eligible population blong 20, 198 pipol, 18 per cen i tekem finis fes dose mo second dose no yet while long Malampa i gat 17, 768 pipol wetem 7 per cen i tekem at least wan dose nomo.

Fika ia Ministry blong Helt i putum aot blong soem namba blong ol pipol we oli tekem vaccine so far.

Long Sanma provins, percentej blong ol health wokman we oli tekem vaccine i hae bitim long shefa inkludum ol nara frantline wokman.