COVID risk assesmen long Wunpuko

Helt Risk Assesment Tim i stap travel i ko daon long Wunpuko long Notwes Santo blong asesem situation blong yacht we i bin kam sho long Wunpuko Vilij long Sandei.

Vanua Sikon, Maneja blong Sanma Pablik Helt, i talem se tim ia i konsis long ol ofisa long helt, customs, immigration mo police.

Mr Sikon i talem se tim i sud kasem Wunpuko long tetei aftenun mo kondaktem risk asesmen blong yacht ia.

“Taem risk asesmen i vinis, olgeta long boda control, customs mo immigration oli akwaerem ol dokumentesen blong yacht wetem ol crew onboard blong faenemaot voyage blong yacht,” Mr Sikon i talem.

Hem i talem se hem ia i blong faenemaot se yacht ia i bin pass tru long ol wanem ports. Hem ia nao bae i helpem risk assessment ripot blong asesem level blong risks blong luk wanem level blong tred we i stap.

Mr Sikon i talem se bae tim i nid blong muvuaot yacht i kam long designated kavman quarantine port long Luganville.

Hem i talem se mo risk assesmen ripot we tim bae i kondaktem bae i determinem weta blong muvum vessel i ko long Vila from hem i onli main quarantine port blong entry blong COVID-19.

“Hopefully bae tumoro olsem, yumi sud karem wan klia respon long situation long Wunpuko,” Mr Sikon i talem.

Chief blong Wunpuko Village, David Molisa, i talem se yacht ia i bin araev long basis long Wunpuko long Sunday moning wetem tu man.

Chief Molisa i talem se yacht ia i kam kolosap longshore mo wan long tufala man ia i swim i ko shore.

“Long taem ia we i swim i kam shore, ol man i stap insaed long jej vinis. Man ia i kam mo wokbaot stret i ko long Praise and Worship jej. Taem hem i ko insaed long jej, hem i shekhan wetem wan brata. Mo hem i stap insaed long jej kasem taem jej prokram i vinis. Mo ol polis ofisa blong vilij kaonsel oli sendemaot whiteman ia i kobak long yacht blong hem,” Chief Molisa i talem.

Chief Molisa i talem se oli bin harem se yacht ia i bin kam long Spain mo from rafis weta mo oli ran short long fuel mo kakae mekem se oli kam shore long Wunpuko.

Hem i talem se wetem advaes we oli karem long helt authority long Luganville, hem i bin restrictim muvmen blong ol pipol i ko long ol nara vilij long Notwes Santo mo advaesem ol pipol blong stap kwaet kasem Risk Assesmen Tim i komplitim asesmen.

Chief Molisa i talem se wetem advaes we oli karem hem i bin putumaot ol security ofisa blong hem blong wajem yacht ia blong i no ko aot, kasem asesmen tim i kasem Wunpuko.