COVID seken dos wan mas

Ol pipol we oli bin karem fes dos blong COVID vaksin long Luganville oli mas kambak blong karem seken dos blong olgeta.

Sanma Rural Health i apil strong long ol pipol we oli no bin kam blong tekem seken dos blong COVID vaksin long NISCOL Terminal, long Luganville Town, blong oli mas kambak blong tekem second dos blong olgeta.

Casimir Liwuslili, Helt Promotions Ofisa long Sanma Rural Helt, i talem se plante pipol we oli bin tekem fes dos blong olgeta long NISCOL long Luganville oli no bin kambak blong tekem ol seken dos blong olgeta.

“So far yumi long Santo, yumi mekem gud long fes dos blong astrazeneca mo sinopharm mbe taem yumi kam long seken dos nao, yumi faenem I had from I kat fulap man oli no kam mo hemia I nogud,” Mr Liwuslili i talem long VBTC Nius.

Hem i talem se long las wik i kam i gat 571 pipol we oli no bin kambak blong tekem seken dos blong Sinopharm COVID-19 vaksin.

Rayline Tavoa, Risk Communication Assistant Officer long Sanma Rural Health, i talem se hem ia i semak tu long ol seken dos blong AstraZeneca. Plante pipol we oli bin tekem fes dos blong AstraZeneca long Luganville oli no bin kam fowod blong tekem seken dos.

“Yumi jekem ol vaccination rikod kad blong yumi ia, yumi no fogetem kad ia, yumi mas stap jekem evri taem deit blong tekem seken dos blong stik,” Mrs Tavoa i talem.

“Sapos u mestem deit, yu no tinktink se bae yu nomo kam tekem stik, yu mas kam.

“Vaccine i naf mo hemi impoten.”

Mr Liwuslili i talem se taem yu karem fes dos nomo, i no protektem yu fulwan long sik COVID-19. Mbe taem yu karem seken dos hem i stopem yu handred pesen blong yu no sik bigwan mo ko long hospital mo yu no ded from COVID-19.