COVID test long tufala yacht sailor

Selly Roger Yacht we i bin ko sho long Wunpuko, notwest Santo, i stap long Luganville kwarentin Port.

Response Tim we i bin ko long Wunpuko blong mekem risk asesmen i kambak wetem yacht ia long Luganville long Thursday.

Manager blong Sanma Public Health, we i kodinatem Response Tim, Vanua Sikon, i talem se bae tim i kolektem swab sample blong tufala sailor ia long tete moning.

Mr Sikon i talem se ten bae tim i sendem ol sample i ko long Port Vila blong mekem swab test blong tufala sailor.

Hem i talem se bae swap tes risal blong tufala bae hemi helpem asesmen ripot blong determinem feta aksen we ol risponsible otoriti bae oli tekem long tufala sailor ia.

Hem i talem se sapos swab test risal i kambak negativ ten bae tim i apliftim ol mesa we oli bin plesem long Wunpuko Vilij.

Mr Sikon i talem se Selly Roger Yacht i bin ko sho long Wunpuko from oli kat problem wetem sail blong olgeta.

Hem i talem se yacht ia i bin aot long Panama Canal long Central America mo from strong win i damejem sail blong olgeta, oli kam pasem Fiji mo kam stret long notwest Santo.