COVID vaccine blong ol hae risk

Ol pikinini stat long bebe kasem 17 yia oli nosave tekem COVID vaccine yet from vaccine i mas ko long ol hae risk grup fastaem.

Leomala Medical i klarifaem kwesten wae ol pikinini kasem 17 yia oli nosave tekem yet COVID vaccine.

Dr Basil Leodoro, Director long Leomala Medical mo Surgeon long Northern Provincial Hospital, i tokbaot.

“From se i nokat vaccine long ful Wol, yumi mas faet from ol vaccine,” Dr Leodoro i talem.

“Ol vaccine o stik meresin blong COVID i kam blong yumitu kivim long ol hae risk grup fastaem.

“Mo hemia nao oli serem i ko long ol health wokman, ol frantlin wokman olsem long Airpot, Customs mo Immigration.

“Afta i ko long olgeta we oli ova 55 yia mo olgeta nao bae oli fesem had taem sapos coronavirus i kam tru long boda; Ol olfala we oli kat ol sik blong Non-Communcable Disease i stap vinis; olgeta we oli 18 kasem 55 yia mo las grup nao hemi olgeta we oli anda long 18 yia.”

Director Basil i talem se taem blong ol pikinini bae i kam yet blong oli save risivim COVID-19 vaccine.

Hem i talem se be naoia ol hae risk grup mo ol pipol long 18 yia i ko antap oli mas tekem COVID-19 vaccine blong bildim proteksen blong olgeta akensem coronavirus.

“So evri samting ia nao i mekem se mifala ol dokta, ol health wokman, mo kavman blong Vanuatu i promotem plante vaccine blong bildim ap proteksen blong yumi ol bigfala man, ol olfala mo ol frantlin wokman, ” Dr Leodoro i talem.

“Taem evri wan i kasem stik meresin blong COVID, yumi kontinu long wok mo once virus i kam insaed, yumi no fulumap ol hospital o faet from ol ventileta masin.

“Mo yumi save luk hao blong vaccinenatem ol pikinini blong yumi.”

So far long Shefa Province araon 19,000 pipol i kasem COVID-19 stik meresin vinis.

Sanma Province bae i stap rolemaot vaccination long manis August.