Criminal kes blong Ambrym Memba blong Palamen long April

Supreme Court bae i harem Criminal kes we i stap agensem Minista blong Climate Change long namba 6 April 2021.

Hemia afta we Magistrate court Judge, Beverly Kanas Joshua i ridim aot six jaj we i stap akensem Minista Bruno Tau Leingkone long eli manis ia.

Long fes wik blong May 2020, Minista blong Climate Change, Memba blong Palamen, Honoroble Bruno Leingkone i bin stap long influens blong alcohol taem i bodem flaet long Santo blong kambak long Port Vila.

Hemia afta long wan ofisiol tua blong Kavman we i mekem blong lukluk long ol damej we Saeklon Harold i kosem long ol aelan long Not.

Folem wan instraksen we i kam long Civil Aviation Authority long taem ia, pilot i bin tekem bak plane wetem minista i ko bak long Santo.

Hemia from anda long aviation regulations, oli no alao blong tekem wan intoxicated man o wan man we i yusum drugs o drink alcohol mo kam insaed long plane.

Ol jaj we i stap akensem Minister Leingkone hemi aksen we i putum denja long sefti blong ol pasenja long aircraft, we hemi akensem section 18 (1) long Aviation security Act CAP10 blong 2007.

Namba two jaj hemi Intoxicated person long aircraft we i stap tu long seksen 21 (1) (a) long Aviation security Act No 10 blong 2007.

Non compliance wetem command we akus i givim long pilot long taem ia, long seksen 22 long aviation security Act No 10 blong 2007.

Failure blong komplae wetem mo observem loa, contrary long seksen 19 mo subseksen 13 (1) (a) long Leadership Code Act CAP 240.

Magistrate Kanas Joshua i konfemem tu se i gat prima facie case.

Hemia i minim se i gat evidens mo i gat kes blong i ko long plea.

Mo Minista Leingkone olsem akus i mas ansa long ol jaj ia.

Mrs Kanas Joshua i talem se ol ofens ia i beyond long Jurisdiction blong Magistrate kot mo bae supreme court bai i sitdaon long namba 6 April blong harem kes ia.

Prosecution i gat 12 witness we oli testify akensem Member blong Palamen blong Ambrym, Bruno Leingkone.

(Visited 1741 times, 1 visits today)

About The Author

You might be interested in