Curfew extend blong faev dei

Niu Curfew i stat long 8pm kasem 6am long tete(March 27) kasem April 1.

Minista blong Health, Bruno Leingkone i mekem anaonsmen ia long National TV tete.

“Tete long aftanun, Council blong ol Minista i mit mo niu direksen olsem minista blong Health mi saenem wan niu oda we hemi oda namba 47 of 2022 we hemi efektiv naoia stat long Sunday March 27 2022. Kondisen blong oda ia hemi minim se i kat wan curfew we hemi aplae long ful Vanuatu long 8pm kasem 6am.  Kondisen blong oda ia hemi blong ful Vanuatu i stil stap long alert level 3 blong wan nara faev dei.

“Shefa mo Sanma hemi stil stap long alert level tri blong faev dei ia. Curfew ia i aplae long evri provins, Tafea, Malampa, Penama mo Torba i stap long alert level 3 kasem taem Ministry blong Health hemi mekem ol tes long ol provins wetem asistens blong Dipatmen blong Local Authority blong konfemem se ol provins oli COVID-19 fri stetas.

Mr Leingkone i talem se inter-aelan travel blong ol pipol i stil stop yet wetem oda ia unless i kat apruvol blong Public Health.

“Ol muvmen blong ol cargo long Port Vila, Luganville mo ol nara aelan i ko hed,” Mr Leingkone i talem.

“Oda ia i minim nomo se ol esential seves nomo i opereit long nekis faev dei. Oda ia bae hemi vinis long April 1 2022. ”

Minista Leingkone i askem pipol blong ko hed pratisim ol rul blong COVID.

“Council blong ol Minista bae i mit bakegen long Tuesday blong tokbaot ol niu oda we bae i kamaot afta long oda ia,” Minista Leingkone i talem.

“Folem gud toktok blong health blong protektem yu wan long COVID. Rispektem mo no pasem kiaman infomesen. Yu we yu no tekem stik yet blong mas ko stik.

“Tank yu long Polis, Port Vila mo Luganville municipal polis long gudfala wok we oli bin mekem long las 24 haoa.”

Minista Leingkone i askem pipol blong prea from ol franlaen wokman we oli wok had long taem blong COVID ia.

Total niu kes hemi 275, aot 275, shefa 231 mo santo kat 44 kes. Total kes naoia hemi 2204. Tu i stap long hospital mo wan i stap long critikol kondisen.

Ministry blong Health i talem se 560 oli rikava, 513 Shefa mo 47 Sanma.

 

(Visited 971 times, 1 visits today)

About The Author

You might be interested in