Damej blong Harold i cosem kavman bigfala mani

Bild bak blong Saeklon Harold bae i kostem Kavman VT 28 billion.

Director General blong Ofis blong Prime Minister, Gregoire Nimbtick, i talem se mani ia, bae oli usum blong bildim bak ol damej we Saeklon Harold i bin kosem.

Hemi talem se Saeklon Harold i bin damejem plante seves blong kavman we ol pipol i depend bigwan long hem.

“Nomoli long saed blong Infrastructure damej, yumi stap minim ol pablik bilding olsem ol skul, dispensari, hospitol mo ol evacuation center,” Hemi talem.

“ Mo i no hemia nomo mbe i kat ol rod, wharf, airport mo sekta blong telecommunication olsem ol tawa blong Digicel mo Vodafone.”

Mr Nimbtick i talem se, kavman bae i holem wan bilateral miting wetem ol difren developmen patna blong hem blong askem sapot blong olketa.

Hemi talem se plante long olketa i kat interes olsem World Bank, Asian Development Bank mo plante moa blong fundem ol pablik bilding olsem blong ol skul, health, ol rod mo ol seves blong telecommunication.

“Mo long nekis wik bae kavman i wok wetem olketa blong karem ol infomesen se amas mani oli wantem help long hem mo amas mani kavman bae i sapot lem tu,” Mr Nimbtick i talem.

“ Prioriti fokas blong recoveri blong Saeklon Harold bae hemi go festaem long ol impoten seves we pipol i nidim olsem health mo education long olgeta provins we cyclone i bin damagem.”

VBTC i kasem toksave se State blong Emergency blong Saeklon Harold i en vinis long namba 9 August.

Mo long taem blong respons long taem blong State blong Emergency, kodinesen i bin stap anda long National Disaster Management Office.

Long saed blong recoveri program blong Saeklon Harold, kodinesen blong hem, i stap anda long Office blong Prime Minister.

I kat wan recoveri plan we bae hemi kaetem kavman wetem ol developmen patna blong oli wok folem long taem blong recoveri.

 

 

(Visited 44 times, 1 visits today)

About The Author

You might be interested in