Damej Ietap skul-Saot West Tanna

Ietap Center Skul long Saot West Tanna i wantem kwik fix long toilet blong skul i save ko hed.

Deputy Principal blong Ietap Center Skul, Thomas Ware i talem long VBTC Nius se skul i no stat yet folem damej blong Saeklon.

Ietap Center Skul i wan bigfala skul long Saot West Tanna mo 8 skul i stap anda long hem we i tekem 500 skul pikinini.

“Wind i bin strong mo i brokem lok blong ofis mo spoilem ol tink, ol kitchen blong ol tija haos i foldaon, toilet blong ol skul pikinini tu i damej,” Mr Ware i talem.

“Mi wantem ol otoriti i mas mekem asesmen kwik blong fixim ol damej espeseli toilet from hem nao i mein samting blong taem ol skul pikinini i kam oli save yusum.

Skul ia i tekem ol pikinini long East, Saot kasem long Green Point we oli travel longwe.

“Skul blong mifala ol pikinini i stap longwe mo stap wokbaot i kam long skul, long taem blong ren olsem sam riva i ron, so skul i dilei smol dipen kondisen, rod tu i nogud ,trak i nosave kam antap yumi mas wokbaot 3 kilomita kam long skul from ol pikinini ia i mas krosem 2-3 riva blong kam long skul evri dei,”Mr Ware i talem.

“Ol garen tu i damej so yumi klin ap long wik ia.”

Mr Ware i talem se oli lukluk blong kat home skul package mo klas haf dei nomo folem kondisen blong skul.

I kat 28 tija mo tu permanent tija long skul.

Jif Bob Kio long Etam Komuniti i talem se i kat ova 1000 pipol mo oli stap long nid naoia.

“Damej ia i semak long evri eria long Tafea mo naoia mifala i wantem kavman i helpem mifala long kakae blong mifala i save planem bak,” Jif Kio i talem.

“Ol mein kakae olsem aelan cabij, taro mo manioc i nogud pa pipol i angre ia.”

I tekem haf haoa blong stap long Lenakel mo kasem Saot West Tanna.