Ded-Rod aksiden

Wan 14 yia old boy i lusum laef blong hem long wan rod aksiden long Klems hill, Efate long tete aftanun.

Polis i konfemem nius ia.

Reliable Sos i talem se wan grup blong ol pipol long Wan Smol Bag i stap travel i kambak long Port Vila long wan box bus(small wan) taem aksiden ia i hapen from brek i nogud.

I no klia se amas pipol long bus be reliable sos i konfemem se ol nara pipol i kasem ol kil long bodi blong olgeta. I kat wan mama we naoia i  fas insaed long bus mo oli mas tekem aot hem.

Aksiden ia i hapen long smol creek blong Klems hill.

Wan bus draeva blong Not Efate we i no wantem talemaot nem blong hem, i talem se aksiden ia i sloem daon traffic.

“Mi sek tumas from mi arem ded blong smol boy ia,” Hemi talem.

Wan nara lokol we i stap kobak long haos long Not Efate i talem se hemi neva luk wan aksiden olsem.

“Ol man oli fas antap long klems hill naoia,” Hemi talem.

“Fulap oli kasem kil long bodi blong olgeta mo Promedic i ko kam blong transpotem olgeta.

“Sam long ol pipol ia oli stap kam blong wajem futbol.”

VBTC Nius i no kasem eni klia infomesen long draeva blong bus be bae hemi apdeit.

Smol boy we i ded i blong Emao/Pele.

 

(Visited 17076 times, 1 visits today)

About The Author

You might be interested in