Ded studen-Hog Harbour skul

Wan yia 8 studen blong Hog Harbour Junior Secondary School long East Santo i ded sam wik i pas taem hemi stap pleiplei wetem wan bigfala sharp knife mo i stikim throat blong hem.

Principal blong Hog Habour Junior Secondary skul, Stanley Warsal i konfemem long VBTC Nius.

Mr Warsal i talem se knife ia i sharp tu saed mo hemi blong wan studen long skul nomo mbe boy ia i tekem mo stap pleiplei wetem nao i mestem i stikim thraot blong hem.

“Kos blong ded ia bae yumi talem se hem nomo i mekem hem wan i ded. Hemi holem wan knife ale hemi stap katem wud olsem ia, i mestem taem i sakem olsem mbe i fas long nek blong hem mbe knife i ko tru,” Mr Warsal i talem.

Principal Warsal i talem se boy ia hemi wan pikinini blong wan tija long skul mo hemi blong Malo.

“Mifala serem smol sori long skul ale mifala ko long Malo ale aftanun mifala i kambak,” Mr Warsal i talem.

Hemi se wetem ded ia hem wetem skul council i bin karem bodi blong leit yangfala ia mo putum i ko long rest long hom aelan blong hem.

Mr Warsal i rimaendem evri wan blong oli mas tekem keaful taem oli yusum knife.