Dengue fever outbrek long Port Vila

Ministry blong Helt i ripotem wan outbrek blong 17 niu dengue fever kes long Port Vila long wik ia.

Ol positiv kes blong dengue ia, Surveillance Tim blong Ministry blong Health, i konfem afta long ol blood sampol we lab blong Vila Central Hospital i ranem mo risal i soem se i positiv.

National Coordinator blong Vector Borne Disease Control Program long Vanuatu, Wesly Donald, i talem se investikesen blong olgeta kes ia i stap ko hed naoia blong faenem aot ples we ol pipol ia i liv long hem mo help daonem sik ia.

Hemi talem se bae oli ko raon long ol eria we ol pipol ia i liv long hem.

“Tim i prepea blong provaedem wan rapid rispons long ol ples we sik ia i kamaot long hem,” Mr Donald i talem.

“Hemia blong mifala i save ko blong mekem observation mo provaedem infomesen long olgeta.

Mr Donald i talem tu se hemia blong mekem wei blong tim i save ko spray blong kilim ded ol mosquito ia.

Long 2nd July 2018, Minista blong Health, Norris Jack Kalmet mo Australian Deputy High Commission long taem ia, Susan Ryle, i rilisim lokol dengue mosquito blong daonem dengue, chikungunga mo zika long Vanuatu.

Len Tarivonda, Director blong Public Health, i talem se pipol i mas klinim ol yad blong olgeta mo distroem ol ples we ol mosquito i save stap breed long hem.

“Yumi eim bigwan se ol lokol mosquito we yumi bin putum bateria long hem sam yia i pas, bae i help daonem sik ia,” Mr Tarivonda i talem.

“Mo yumi stap monitarem level blong hem.”

Ol 17 pipol we oli kasem sik blong dengue fever ia oli stap naoia long Vila Central Hospital mo tekem tritmen.

 

 

 

(Visited 438 times, 1 visits today)

About The Author

You might be interested in