Dijitol sistem blong impruvum domestik tax

Vanuatu i nid blong kat wan dijitol sistem we i konektem evri bisnis blong impruvum rikod blong domestik tax.

Minista blong Finance mo Economic Management, Honoroble Johnny Koanapo, i talem toktok ia long International Customs day mo tax wik long Convention Senta long Port Vila.

Minista Koanapo i talem se manejmen mo bod blong Vanuatu Chamber blong Commerce mo Industry i sud save hamas memba blong hem mo krietem wan sistem blong hukum evri bisnis ia i ko long dijitol sistem ia

Minista Koanapo i talem se sapos evri bisnis ia yusum sistem ia bambae emi impruvum koleksen blong domestik tax.

“Evri dei laef blong yumi, yumi ko insaed long ol sto, yu luk ol sto blong yumi fulap oli no konek long wan sistem we hemi link direk i ko long kavman blong rikodem deili sel, capjarem hamas worth blong sale blong yu we hemi save translate long wanem hemi due long gavman tru long Value Added Tax (VAT) o tru long ol impot duti stat long boda kam kasem long kaonta sel,”Minista Koanapo i talem.

Minista Koanapo i talem se Dipatmen blong Customs mo Inland Revenue i nid blong wok tugeta wetem ol stekholda blong hem olsem Vanuatu Chamber blong Commerce blong mekem se sam bisnis i no ronwe blong pem mani blong kavman we oli kolektem tru long Valiu aded tax.

“Yumi mas jenjem sam samting, mi notisim plante people oli tekem samting blong nating nomo, me wantem jenjem sam legislation o loa blong putum presa long pipol we oli ranem ol bisnis blong yumi muv i ko insaed long electronic system.

Plante long ol bisnis long kaontri oli no stap insaed long system blong pem tax i kobak long kavman.

Kavman hemi stap lusum plante revenu o mani we i sud kamaot long ol Business Tax.

Director blong Customs, Harold Tarosa, i talem se i kat ova 1000 bisnis we oli no bin pem tax, mo hemi deit i ko bak long 1998 taem we kaontri hemi introdusum VAT.

Presiden blong Vanuatu Chamber blong Commerce mo Industry, Antoine Boudier, i talem se hemi duti blong evri bisnis blong pem tax i ko long kavman from long wei ia hemi kat pawa blong sapotem bak wanwan komuniti long ol developmen we i stap kam.

“Sapos oli no rijista i minim se ol stap brokem mama law blong Vanuatu so mi stap apil long yumi evriwan ol bisnis yumi traem folem mama hemi wan simpol samting. Sapos yumi folem bambae kavman i glad long ol seves we oli stap mo yumi save se bambae i kat gudfala rod, hospital mo skul,” Mr Boudier i talem.

“Mbe sapos yumi no mekem ol samting ia, hao nao bai yumi save kasem ol seves ia.”

Director Tarosa i talem se impruvmen long domestic tax bae hemi soem se kaontri i kat wan ful functioning tax koleksen system we i benefitim evriwan.

Hemi talem se tete impot duty i hae bitim domestik tax.

 

(Visited 200 times, 1 visits today)

About The Author

You might be interested in