Diklaen long kokonat crab populesen

Namba blong kokonat crab long Vanuatu i kontinu blong ko daon from pipol i ova havestem olgeta.

From risen ia Fisheries Department i kivimaot wan oda blong banem Torba Province blong no havestem krab kokonat blong kakae mo salem stat long manis ia.

Oda ia i talem se wan man i no mas tekem, kakae, salem, spolem mo kilim kokonat crab long Torba Province. Sapos eni man i mekem ol samting ia, bambae hem i faen wetem wan amaon blong VT 50,000.

Deputy Director Coastal long Fisheries Department, Sombert Gereva, i talem se long 2018 Fisheries Department i bin mekem wan asesmen long populesen blong kokonat crab long Torba. Asesmen ia i soem se populesen blong ol kokonat crab we oli gud blong pipol i save havestem hem i smol kompea long yang populesen we pipol i no mas havestem.

Hem i talem se kokonat crab hem i wan fishery we i stap anda long fisheries akt. Hem i gat ol rul blong hem long hao pipol i save havestem mo mekem mani long hem. Rul ia i no fokas nomo long Torba Provins mbe hem i blong everi aelan long Vanuatu we oli gat kokonat crab.

Mr Gereva i talem se long wan wan aelan i gat wan limit namba blong ol crab we pipol i save havestem witin wan fishing season.

Felix Ngwango, Principal Compliance Officer long Fisheries Department, i talem se pipol blong Torba Province, espeseli ol aelan long Torres i mas komplae long ban ia mo oli wantem se oli koperet long wan stadi we bae oli kontaktem long ples blong olketa i no longtaem.

Hem i talem se long Torba i gat tu laesens holda we oli stap pem krab kokonat mo oli entaetol long 5000 krab long taem blong wan havest.

Mbe Kimstone William, Community Liaison Officer long Torres, i talem se ol pipol i awea vinis long ban ia mbe sam oli no hapi long ban we i stap.

Hem i talem se ol pipol long Torres i reisem plante kwesten long wae Fisheries Department i no bin ko consal wetem ol pipol long kraon bifo oli mekem ban.

“Fisheries Department i sud kam mo consal wetem ol lida mo luk ol ril situasen we i stap long graon bifo yumi save kam ap wetem tingting blong ban,” Mr William i talem.

Hem i talem se kokonat crab hem i mein sos blong mane blong ol pipol long Torres.

Hem i talem se i gat ol narafala agrikaljarol sos blong inkam we ol pipol i faenem mani long hem mbe i nidim ol agrikalja ofisa blong ko long eria ia mo save introdusum sam agrikaljarol method blong impruvum faming sistem long Torres.

Mr William i talem se naoia bae ol pipol i fokas nomo nao long copra mo fish blong mekem mani.

“Praes blong copra i low tumas so pipol i no intres tumas blong mekem mani long hem,” hem i talem.

(Visited 40 times, 1 visits today)

About The Author

You might be interested in