Dilei blong bildim bak Luganville townhall

Minister blong Internal Affairs i talem se tender proses blong Kavman i dileiem wok blong bildim bak Lungaville minisipol taonhol.

Honoroble Ismael Kalsakau i talem sori from ol proses blong kavman i slo tumas.

Hemi talem se nomata se tender proses i slo mbe i kat mani we kavman i kivim blong help bildim bak bilding ia.

“Dilei ia hemi folem proses blong tender mbe long steij naoia wan kampani i sekurem tender ia vinis,” Minister Kalsakau i talem.

“I kat wan persen we hem nao hemi sakses bida mo hemia bambae luganville municipal nao bambae hemi ranem.”

Long June 2020, Ministry blong Internal Affairs i kivim mani aot long budget blong hem wan amaon blong VT 30 million blong sapotem Luganville townhall afta long damej blong Saeklon Harold long manis April.

“Olketa oli kat mani we stap wetem olketa vinis mo oli bin ko tru long tender, tender i jes vinis nomo mo oli sud stat bild kwiktaem mo vinisim ariap from institution ia nao hemi stap mekem mani blong Luganville Municipal Council,” Minister Kalsakau i talem.

Kavman hemi bin promisem ol pipol blong luganville se taonhol ia i sud stanap bakeken long en blong las yia mbe i no bin posibol.

Minista Kalsakau i talem se plante projek blong kavman i stap long tender yet mo plan blong kavman blong tede i wantem kwik proces we hemi folem transparency.

Minista blong Finance mo Economic Management Honoroble Johnny Koanapo, i statem vinis proces blong kavman kontract long tenders act blong mekem sua se ol proces blong tender long ol projek i ariap.

 

(Visited 119 times, 1 visits today)

About The Author

You might be interested in