Dilei long wok blong freshwota sports stadium

COVID- 19 pandemic i dileiem wok blong Vanuatu Football Federation Freshwota sports stadium long Efate.

Side forman blong Ninane Construction mo Atom Limited, Joseph Viramatuleo, i talem long VBTC sport long wik ia se i kat dilei long sam material blong mein grand stand mekem se i slowem wok lelbet.

Hemi talem se ol material ia bae oli kam nomo long en blong manis ia October.

“ Ol material ia hemi ol wire blong mein grandstand mo oli sapos blong kam long en blong las manis September,” Mr Viramatuleo i talem.

“Mbe nomata long dilei ia, wok i kohed mo i stap long 40 percen blong komplete.

“ Naioa mifala i stap mekem futpat mo ol nara wok wet long ol material ia blong kam.”

Mr Viramatuleo i talem se tickiting haus mo garden shade i stap ko blong vinis nao.

“ Tickiting haos i kasem ova 50 percen long wok blong hem mo i semak long garden shade,” hemi talem.

“ Insaet long tickiting haus bai i kat tu kaonta wei bai ol pipol i pem ticket long hem.

“ Football field i redi vinis mbe ol saet wok nao i stap ko hed.”

Mr Viramatuleo i talem se naioa ol masin i stap digim ples blong mein grandstand.

Freshwota stadium ia FiFA we hemi hae bodi blong futbol i kivim mani from we hemi VT 250 million mo wok i bin stat eli long yia mo blong vinis afta long 18 manis.