Disasta risk event long Luganville

Niufala elek Mayor blong Luganville i askem pipol long Santo blong pat long Disasta Risk Ridaksen event blong save moa long ol disasta.

Alan Awa i mekem kol ia long wik ia blong talem se Sanma Provins hemi wan ples we disasta i stap kasem evri taem.

Mr Awa i kol blong pablik i kam raon mo visitim olgeta boots we hemi stap blong save moa infomesen long ol wanem disasta i stap afektem kaontri.

Hemi talem se National Disaster Management Ofis i kam blong educatem pipol long Luganville.

Town Clerk blong Luganville Municipality, Jonathan Iavre, i talem se disasta i no mekem apointmen bifo hemi kam.

“Disasta hemi wan samting we hemi no kivim wan apointmen long yu se mi stap kam bae mi mitim yu long taem ia,” Mr Iavre.

“Hemi hapen long taem we hemi raet timing blong hem blong hemi kam.

“Ren tete, ren we i hapen ia, plante ples long Luganville ia oli kasem flood.”

International Disaster Risk Reduction dei i bon long 1989 long United Nations General Assembly long America, mo hemi dei we olgeta lida long taem ia i bin jusum blong promotem ol fasin we yumi save yusum olsem prevention blong disasta mo priperesen.

Ol Non-Government Organisation, ol Kavman Dipatmen mo Private Sekta i join tuketa long program ia blong sapotem from oli luk bigfala jalenj we Saeklon Harold i kosem long Sanma provins long 2020.

Abraham Nasak, Director blong National Disaster Management Ofis, i talem se ol infomesen ia hemi blong pipol i save from ol smol aksen i kontribut long disasta risk reduction.

Tete hemi las dei blong even ia mo pipol i save faenem aot tu wok we wan cluster i stap mekem long wan disasta.