Domestik travel i open- Efate mo Santo

Ol pipol i save travel in mo aot long Efate mo Santo folem COVID travel plan.

Minista blong Health, Bruno Leingkone, i mekem anaonsmen ia long National TV tete(Friday) naet.

Hemi wan tinkink we Council blong ol Minista i apruvum long miting blong hem long wik ia.

“Mbe evriwan i mas folem travel guide mo standard blong operation prosija we Ports mo Harbour(long solwota) mo Civil Aviation(long air) i talemaot blong folem,” Minista Leingkone i talem.

Acting Director blong Public Health, Dr Jenny Stevens, i talem se travel plan ia i efektiv long March 20.

“I nokat eni ristriksen from travel hemi stap bitwin tu eria we transmission blong COVID-19 i stap finis long hem,” Dr Stevens i talem.

Mbe Dr Stevens i talem se sapos pipol i aot long wan ples we i nogat COVID blong ko long ples we i gat kes bae i gat sam ristriksen from oli tekem own risk.

“Sapos wan man i stap long Tanna, Epi, Ambrym o nara aelan mo hemi wandem travel i kam long Port Vila o Santo bai hemi save travel Mbe hemi save se taem hemi travel i kam, transmission blong COVID hemi hae, so bai yumi talem se taem yu travel i kam mbe long own risk blong yu nao.

Hemi talem se oli mas mekem sua se taem oli travel oli mas tekem stik.

Dr Stevens i talem se ol pipol we oli aot long hotspot i ko long nara aelan we i nogat sik hemi aplae nomo long ol essential woka nomo wetem olgeta long Health.

“Wan essential wokman olsem wan kavman woka we i nid blong ko mekem wan wok long aelan, olgeta long ol bank oli nid blong ko mekem wan wok long ol aelan mo sapos oli travel out long Vila i ko long Ambrym or Banks hemia i gat ristriksen long hem. Mo ristriksen ia hemi sapos hemi travel long wan afek eria i ko long ol eria we i nogat kes bai hemi mas mekem wan COVID test, 48 haoa bifo travel, mo taem hemi kasem ples we hemi wandem ko long hem bai hemi mas kwarentin blong tri dei, mo mekem wan nara test sapos hemi negative ale hemi save ko aot blong mekem wok,” Dr Stevens i talem.

“Ol health woka we oli kam ovasi oli save travel i kam long Vanuatu mbe wetem ristriksen. Wetem ol travel plan ia, hemi wan mas blong evriwan we i travel i folem ol strik mesa mo protocol we Ministry blong Health i putum.”

Minista Leingkone i talem se “Council blong ol Minista hemi agri se international travel hemi blong olgeta emergency nomo. Mo olgeta flaet we i ko aot nomo long kaontri. Council blong ol Minista hemi agri se bambae i kat inbound pasenja inkludum ol wokman we oli pat long Seasonal Workers Program mo Recognised Seasonal Employer mo health Emergency Advisory Council nao bambae hemi save givim apruvol.”

 

 

(Visited 1471 times, 1 visits today)

About The Author

You might be interested in